ខេត្តកណ្តាល ៖ បុរសម្នាក់ ចិត្តសឿង ខឹងប្រព្ធមិនយកបាយឲ្យហូប ដុតរថយន្តបែនដឹកដី ឆេះខ្ទេចយ៉ាងសន្ធោសន្ធៅ បង្កការភ្ញាក់ផ្អើល ដល់អ្នកភូមិ នាំគ្នាជួយពន្លត់ និងរាយការណ៍ជូនសមត្ថកិច្ច ដើម្បីចុះមកបាញ់ពន្លត់ កាលពីវេលាម៉ោង ៣និង២៥នាទី រសៀលថ្ងៃទី២៧ ខែសីហា ឆ្នាំ២០២៣ នៅចំណុចផ្លូវបេតុង ភូមិឃ្លាំងមឿងត្បូង សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។

សមត្ថកិច្ចបានឲ្យដឹងថា រថយន្តដែលឆេះនេះ ជាប្រភេទរថយន្តបែនដឹកដី ម៉ាកហ៊ីយ៉ាន់ដាយ ចំណុះ ២៤តោន ពាក់ផ្លាកលេខ ភ្នំពេញ 3E-8405 (ឆេះខូចខាតកាប៊ីនមុខអស់ទាំងស្រុង) តែមិនបណ្តាលឲ្យមានមនុស្សរងរបួសនោះទេ ។

ភ្លាមៗ កម្លាំងជំនាញបង្ការពន្លត់អគ្គីភ័យ និងសង្គ្រោះររបស់អធិការដ្ឋាន នគរបាលក្រុងអរិយក្សត្របានអន្តរាគមន៍ ដោយប្រើប្រាស់រថយន្តពន្លត់អគ្គិភ័យចំនួន ០៣គ្រឿង ប្រើប្រាស់ទឹក អស់ចំនួន ០៣ឡាន រួមមាន​៖

-រថយន្តរបស់អធិការដ្ឋាននគរបាលក្រុងអរិយក្សត្រចំនួន០២គ្រឿង ប្រើប្រាស់ ទឹកអស់ចំនួន ០២ឡាន, ២-រថយន្តរបស់អធិការដ្ឋាននគរបាលស្រុកល្វាឯមចំនួន០១គ្រឿងប្រើប្រាស់ទឹក អស់ចំនួន ០១ឡាន។ បណ្តាលឲ្យឆេះខូចខាតកាប៊ីនមុខអស់ទាំងស្រុង។

ចំណែកមូលហេតុ សមត្ថកិច្ចបញ្ជាក់ថា មកពីខឹងប្រពន្ធមិនយកបាយ អោយហូបក៏យកដែកកេសដុតខោអាវបោះចូលក្នុងកាប៊ីនរថយន្តបណ្តាលឲ្យឆេះតែម្ដង៕ មេសា