រាជធានីភ្នំពេញ​៖ និស្សិតស្រីស្រស់ស្អាត ផ្នែកIT ម្នាក់ បានស្លាប់ក្នុងថ្លុកឈាមយ៉ាងរន្ធត់ ខណៈជិះម៉ូតូZoomer-X តាមផ្លូវ ត្រូវបានរថយន្ត ឡង់គ្រីស័រ បុកពីក្រោយបណ្តាលឲ្យដួល រួចខ្ទាតចូលរថយន្ត បាឡែន មួយគ្រឿងទៀត យ៉ាងរន្ធត់នៅកណ្តាលផ្លូវ កាលពីវេលាម៉ោង ៦និង៣០នាទី យប់ថ្ងៃទី២៨ ខែសីហា ឆ្នាំ២០២៣ នៅចំណុចលើផ្លូវ៣៧១សូឡា  ភូមិទ្រា១ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង ខណៈម៉ូតូZoomer-X ពណ៌ស ក្រហម ស្លាកលេខ កំពង់ចាម 1U 6786 ជិះដោយ និស្សិតស្រីស្រស់ស្អាត ផ្នែកIT ម្នាក់ ឈ្មោះ ភុំ ស្រីណេង ស្នាក់នៅភូមិដូនដុំ ឃុំសូទិព្វ ស្រុកជើងព្រៃ ខេត្តកំពង់ចាម បើកបរក្នុងទិសដៅពីត្បូងទៅជើង តាមបណ្តោយផ្លូវខាងលើ លុះដល់ចំណុចកើតហេតុ ក៏ត្រូវបានរថយន្ត ម៉ាក ឡង់គ្រីស័រ  ពណ៌ទឹកមាស ពាក់ស្លាកលេខ ភ្នំពេញ2AE 7684 បើកបរដោយមិនស្គាល់ឈ្មោះនិង មិនស្គាល់អាស័យដ្ឋាន បើកបរត្បូងទៅជើង មកបុកម៉ូតូពីក្រោយ ផ្លោងខ្ទាតមកបុកជាមួយ រថយន្តមួយគ្រឿងម៉ាក បាឡែន  ពណ៌ទឹកមាស ស្លាកលេខ ភ្នំពេញ 2AE7524 បើកបរដោយឈ្មោះ អោម សុឃឿន ភេទប្រុស អាយុ៣៣ អាស័យដ្ឋានផ្ទះ៣៩ ផ្លូវ០៩ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ ភ្នំពេញ ដែលកំពុងបើកបញ្ច្រាសទិសគ្នាពីជើងទៅត្បូង បណ្តាលឲ្យ និស្សិតស្រីស្រស់ស្អាត ផ្នែកIT ខាងលើ ស្លាប់ក្នុងថ្លុកឈាមយ៉ាងរន្ធត់បំផុត ។ ចំណែកអ្នកបើកបររថយន្ត ឡង់គ្រីស័រ វិញ បានចុះរត់គេចខ្លួនបាត់ស្រមោល ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌមានជ័យ សហការជាមួយនគរបាលចរាចរណ៍ក្រុង ចុះមកធ្វើការវាស់វែង យករថយន្ត និងម៉ូតូ សរុបទាំង៣គ្រឿង ទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ មេសា