រាជធានីភ្នំពេញ ៖ មានការភ្ញាក់ផ្អើលខ្លាំងនៅលើស្ពានច្បារអំពៅ ខណៈបុរសម្នាក់ បានបីកូនប្រុស អាយុ១ខួប ដែលមានមុខមាត់អំណោយទាន គួរឲ្យខ្នាញ់ មកលោតទឹកសម្លាប់ខ្លួន ពីលើស្ពានច្បារអំពៅ ដើម្បីបញ្ចប់ជីវិត ២នាក់ឪពុកកូន ឲ្យផុតពីលោកនេះ តែសំណាងត្រូវបានអ្នកដំណើរផ្សេងទៀតបានឃើញ ប្រញាប់ឈប់ម៉ូតូស្ទុះទៅចាប់ឃាត់បានមកវិញ ។

ហេតុការណ៍នេះបានកើតឡើងកាលពីវេលាម៉ោង ១០យប់ ថ្ងៃទី៣០ ខែសីហា ឆ្នាំ២០២៣ លើស្ពានច្បារអំពៅ ក្នុងសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ។

បងប្រុសខាងលើ បានរៀបរាប់ថា គាត់រាល់ថ្ងៃលំបាកណាស់ គ្មានអ្នកណាយល់ពីទុក្ខគាត់ទេ ជីវភាពក្រលំបាកទៅហើយ រកតែលុយបង់ថ្លៃទឹក ថ្លៃភ្លើង បង់បន្ទប់ជួល គ្មានផង បែរជាប្រពន្ធរត់ចោលទៀត ទុកឲ្យគាត់រស់នៅជាមួយកូនប្រុសតូច អាយុ១ខួប ទឹកដោះគោកូន ក៏គ្មានលុយទិញ ទើបគិតខ្លី ជិះម៉ូតូម៉ាកស្មាស់ ដៃម្ខាងបីកូន មកឡើងលើស្ពានច្បារអំពៅ ដើម្បីបញ្ចប់ជីវិត ២នាក់ឪពុកកូន ឲ្យផុតពីលោកនេះ តែសំណាងត្រូវបានអ្នកដំណើរផ្សេងទៀតបានឃើញ ប្រញាប់ឈប់ម៉ូតូស្ទុះទៅចាប់ទាញដៃមកវិញ ។

បន្ទាប់ពីកើតហេតុ សមត្ថកិច្ចប៉ុស្តិ៍ច្បារអំពៅទី១ បានចុះមកដល់កន្លែងកើតហេតុ រួចក៏ធ្វើការសាកសួរបុរសខាងលើ និយាយណែនាំមួយសន្ទុះធំ ទើបគាត់ព្រមដឹកកូនត្រឡប់ទៅផ្ទះវិញ ៕ #N