ខេត្តតាកែវ ៖ ជនសង្ស័យ២នាក់ ជាមុខសញ្ញាដើរលួចយ៉ាងសកម្ម ត្រូវបានសមត្ថកិច្ចក្រុងដូនកែវ បង្ក្រាបនិងឃាត់ខ្លួនបាន ក្រោយធ្វើសកម្មភាព ចូលលួចកាត់ត្រយ៉ូវ​សោរ​ទ្វា​បន្ទប់ទីចាត់ការ​របស់សាលាបឋមសិក្សា​បារាយណ៍ លួចយកសម្ភារៈ​អស់​មួយចំនួន​ កាលពីវេលាម៉ោង ១១និង ៣០នាទីយប់ ថ្ងៃទី២៨ ខែសីហា ឆ្នាំ ២០២៣ នៅភូមិស្វាយជ្រុំ សង្កាត់បារាយណ៍ ក្រុងដូនកែវ ខេត្តតាកែវ ។

ក្នុងនោះសម្ភារៈបាត់បង់រួមមាន ៖ ម៉ាស៊ីនព្រីនធឺរម៉ាក EPSON ពណ៌ខ្មៅ ចំនួន០១គ្រឿង ,ស្ទីកឃឺរ ម៉ាកBT AUX ពណ៌ខ្មៅ ចំនួន០១គ្រឿង ,ឧបករណ៍បញ្ជូលភ្លើងកុំព្យូទ័រ​យួរដៃ​ និងម៉ាស៊ីនព្រីនធឺរចំនួន០២ខ្សែ។

ក្រោយធ្វើសកម្មភាពជនសង្ស័យខាងលើបានយកសម្ភារៈ​គេចខ្លួន​។ លុះដល់ម៉ោង០៧ថ្ងៃទី២៩ ខែឆ្នាំដដែល ទើបជនរងគ្រោះឈ្មោះ​ ជ័យ ស៊ន ភេទប្រុស អាយុ៥៥ឆ្នាំ មុខរបរគ្រូបង្រៀន មានទីលំនៅ​ភូមិខាន់ខាវ សង្កាត់បារាយណ៍ ក្រុងដូនកែវ ខេត្តតាកែវ បានដាក់ពាក្យបណ្តឹង​នៅប៉ុស្តិ៍នគរបាលរដ្ឋបាលបារាយណ៍ដើម្បីជួយអន្តរាគមន៍។​

ដោយអនុវត្តតាមបទបញ្ជាយ៉ាងម៉ឺងម៉ាត់ពីសំណាក់ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងមានការសម្របសម្រួលនីតិវិធីពី ឯកឧត្តម ឯក ឆេងហួត ព្រះរាជអាជ្ញា​ អមសាលាដំបូងខេត្តតាកែវ។ ក្រោយ​ទទួលបានបណ្តឹងពីជនរងគ្រោះខាងលើ​លោក​វរសេនីយ៍ឯក ឥន្ទ មណ្ឌល អធិការ នៃអធិការដ្ឋាននគរបាលក្រុងដូនកែវ បានដឹកនាំបញ្ជាកម្លាំងជំនាញ នៃអធិការដ្ឋាន​សហការជាមួយកម្លាំងប៉ុស្តិ៍នគរបាលរដ្ឋបាលបារាយណ៍​ចុះទៅដល់កន្លែងកើតហេតុធ្វើការស៊ើបអង្កេតស្រាវជ្រាវដើម្បីកំណត់មុខសញ្ញា​លុះដល់ម៉ោង៩ ថ្ងៃទី២៩ ខែឆ្នាំដដែល ទើបកម្លាំងសមត្ថកិច្ច ធ្វើការស្រាវជ្រាវ និងបានឃាត់ខ្លួនជនសង្ស័យម្នាក់ ឈ្មោះ​ ញេប តូម៉ន ហៅហុង ភេទប្រុស អាយុ២២ឆ្នាំ មុខរបរមិនពិតប្រាកដ មានទីលំនៅ​ភូមិ​និង​សង្កាត់​កេីតហេតុ​ខាងលើ​ យកមកកាន់អធិការដ្ឋាននគរបាលក្រុងដូនកែវ​ដើម្បីសាកសួរ។

ក្រោយធ្វើការសាកសួរទើបសមត្ថកិច្ចយើងបានធ្វើការស្រាវជ្រាវបន្តរកមុខសញ្ញាដែល​ពាក់ព័ន្ធ​ រហូតដល់វេលាម៉ោង១៦និង៣០នាទី ថ្ងៃទី២៩ ខែឆ្នាំដដែល បានឃាត់ខ្លួនជនសង្ស័យម្នាក់ទៀតឈ្មោះ ញ៉ាវ សូប៉ាយ ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅភូមិនិងសង្កាត់​កេីតហេតុ​ខាងលើ(អ្នកធ្វើសកម្មភាពកាត់សោរបន្ទប់ទីចាត់ការ) យកមកកាន់អធិការដ្ឋាននគរបាលក្រុងដូនកែវ ដើម្បីសាកសួរដោយជនសង្ស័យឈ្មោះ​ ញ៉ាវ សូប៉ាយ បានសារភាពថារូបគេពិតជាបានធ្វើសកម្មភាពចូលលួចកាត់សោរបន្ទប់ទីចាត់ការ និងបានលួចយកសម្ភារៈខាងលើទៅលាក់ទុកនៅក្នុងព្រៃខាងក្រោយផ្ទះរបស់គេ។

ពេលនេះជនសង្ស័យខាងលើ ត្រូវបានកម្លាំងជំនាញ នៃអធិការដ្ឋាននគរបាលក្រុងដូនកែវ បានធ្វើការកសាងសំណុំរឿងនិងបញ្ជូន​ជនសង្ស័យ​ខាងលើទៅការិយាល័យជំនាញ នៃស្នងការដ្ឋានចាត់ការបន្តតាមនីតិវិធីច្បាប់​៕ អែល វិចិត្រ