ខេត្ត​កំពង់​ធំ​៖ រម៉កម៉ូតូមួយគ្រឿង បានឆេះយ៉ាងសន្ធោសន្ធៅ ត្រូវបានសមត្ថកិច្ច ចេញរថយន្តពន្លត់អគ្គិភ័យ មកធ្វើការបាញ់ពន្លត់ កាលពីវេលាម៉ោង ១០ និង៥៥នាទី ថ្ងៃទី៣០ ខែសីហា ឆ្នាំ២០២៣ នៅចំណុចលើផ្លូវក្រាលកៅស៊ូខាងកើតភូមិ សំរិត ឃុំ សំបូរ ស្រុក ប្រាសាទសំបូរ​ ខេត្ត​កំពង់​ធំ​ ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ។

សមត្ថកិច្ចបានឲ្យដឹងថា ភ្លើងឆេះម៉ូតូអូសរម៉កចំនួន១គ្រឿងម៉ាក​ Yamaha អ្នកបើកបរឈ្មោះ ភក្តី ភ័ក្កត្រា ភេទប្រុស អាយុ១៩ឆ្នាំ រស់នៅភូមិចារ ឃុំសំបូរ ស្រុកប្រាសាទសំបូរ ខេត្ត​កំពង់​ធំ​ បណ្តាលឲ្យឆេះខ្ទេច ។

ចំណែកមូលហេតុ សមត្ថកិច្ចបញ្ជាក់ថា បណ្តាល​មក​ពី​សាំងស្រក់លើក្បាលប៊ូស៊ីម៉ូតូបណ្តាលឲ្យឆេះតែម្តង​ ។

ភ្លាមៗរថយន្តពន្លត់អគ្គិភ័យរបស់អធិការដ្ឋាននគរបាលស្រុកប្រាសាទសំបូរបានចេញអន្តរាគមន៍ចំនួន ១គ្រឿង បានប្រើប្រាស់ទឹកអស់ចំនួន១រថយន្ត​ ស្មើនិង០៤ម៉ែត្រគូប ៕