ខេត្តកំពង់ស្ពឺ ៖ យោងតាមផេក ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា មុននេះបន្តិចមាន ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយរថយន្តស៊ីទែនដឹកហ្គាស មួយគ្រឿង បានបុករះ ជាមួយរថយន្តទេសចរណ៍ នៅចំណោទពេជ្រនិល លោកយាយម៉ៅពេជ្រនិល ក្រឡាប់ធ្លាក់ពីលើផ្លូវ គាបជាប់មនុស្ស មានអ្នករបួសធ្ងន់ស្រាលជាច្រើននាក់ ។

ហេតុការណ៍នេះបានកើតឡើង នៅវេលាម៉ោង ១១និង ៣០នាទីព្រឹកថ្ងៃត្រង់ទី ៣១ ខែសីហា ឆ្នាំ២០២៣ ចន្លោះគីឡូម៉ែត្រ ១០៣-១០៤ ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្ដកំពង់ស្ពឺ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង រវាងរថយន្ត១គ្រឿង ម៉ាក​SHACMAN ពណ៌ស ពាក់ស្លាកលេខ ភ្នំពេញ​3G​-​1758 សណ្តោងរ៉ឺម៉ក ពណ៌ស ពាក់ស្លាកលេខ ភ្នំពេ​ញ​ 4B-0249 ​(អ្នកបើកចុះរត់គេចខ្លួន) បើកបរក្នុងទិសដៅពីកើតទៅលិច ដល់ចំណុចខាងលើ បានបុករថយន្ត១គ្រឿង ម៉ាក​ហ៊ីយ៉ាន់ដាយ ពណ៌លឿង ពាក់ស្លាកលេខ ភ្នំពេញ​3​C​-3445​ សណ្តោងរ៉ឺម៉ក់ ពណ៌លឿង ពាក់ស្លាក​លេ​ខ ភ្នំពេញ​ 4A-1424 អ្នកបើកបរមិនស្គាល់អត្តស​ញ្ញា​ណ រួចបន្តទៅបុករថយន្ត១គ្រឿងទៀត ម៉ាក​F​O​RD TRANST ពណ៌ខៀវ ពាក់ស្លាកលេខ ភ្នំពេញ ​3F-​5​325 អ្នកបើកបរមិនស្គាល់អត្តសញ្ញាណ ដែលកំពុងបើកបរបញ្រ្ចាសទិសគ្នា ។

ក្នុងករណីគ្រោះថ្នាក់ខាងលើ បណ្ដាលឲ្យស្លាប់ម្នាក់ របួសស្រាលធ្ងន់​ -​ ស្រាល​ មួយចំនួន និងខូចខាតរថយន្ត៣គ្រឿង ក្នុងនោះមាន២គ្រឿងខូចខាតធ្ងន់ធ្ងរ ។

ទោះបីជាយ៉ាងណា ករណីនេះសមត្ថកិច្ចបញ្ជាក់ថា បណ្ដាលមកពីមេឃកំពុងធ្លាក់ភ្លៀង ផ្លូវជាតិរអិល ទើបបណ្តាលឲ្យមានគ្រោះថ្នាក់បែបនេះកើតឡើង ខណៈកម្លាំងនគរបាល កំពុងជួយសម្រួល ចរាចរណ៍នៅកន្លែងកើតហេតុ ជៀសវាងបង្កឲ្យមានការកកស្ទះចរាចរណ៍ អន្ដរាគមន៍ជួយជនរងគ្រោះ ។