រាជធានីភ្នំពេញ ៖ កម្លាំងព្រហ្មទណ្ឌនគរបាលខណ្ឌឫស្សីកែវ ប្រដេញបានជនសង្ស័យ២នាក់ ពីអង់តែនទួលគោក រហូតដល់ក្រោយសាលាសន្ធរម៉ុក ទើបឃាត់ខ្លួនបាន បញ្ជូនទៅអធិការដ្ឋាននគរបាលខណ្ឌឫស្សីកែវ នៅវេលាម៉ោង១១យប់ ថ្ងៃទី៣១ ខែសីហា ឆ្នាំ២០២៣។​

តាមសម្ដីពីលោកអធិការងទទួលផែនព្រហ្មទណ្ឌនគរបាលខណ្ឌឫស្សីកែវ បានអោយដឹងថា មុនពេលកើតហេតុ កម្លាំងរបស់លោក បានដឹកនាំចុះល្បាតនៅផ្លូវទំនប់៧០ មកដល់គល់អង់តែនទួលគោក ក៏ឃើញបុរស២នាក់ ជិះម៉ូតូនិច ហៅអោយឈប់ ភ្លាមនោះជនសង្ស័យទាំង២នាក់ នាំគ្នាបើកម៉ូតូជិះរត់គេចពីសមត្ថកិច្ច ហើយក៏បោះសោកាច់កម៉ូតូនៅមុខសាលាទួលគោក រួចជិះរត់រហូតដល់ក្រោយសាលាសន្ធរម៉ុក ទើបឃាត់ខ្លួនបានទាំង២នាក់ និងសោកាច់ក យកទៅបញ្ជូនទៅអធិការនគរបាលខណ្ឌឫស្សីកែវ ដកហូបវត្ថុតាងរួមមាន ដូចជា ម៉ូតូស៊ុយសាគីនិច មួយគ្រឿង សោដែកប្រើសម្រាប់កាច់កម៉ូតូចំនួន១គ្រាប់ ខណៈជនសង្ស័យទាំង២នាក់នេះ ស្នាក់នៅខណ្ឌច្បារអំពៅ មុខរបរមិនពិតប្រាកដ។

ក្រោយពេលកើតហេតុ ជនសង្ស័យទាំង២នាក់ ខាងលើ ត្រូវបាននាំយកទៅអធិការដ្ឋាននគរបាលខណ្ឌឬស្សីកែវ ដើម្បីសួរនាំ និងកសាងសំណុំរឿងចាត់ការតាមច្បាប់បន្តទៀត ៕ Mrr Ka