ខេត្តកំពង់ចាម ៖ ករណីគ្រោះថ្នាក់ចរាចរណ៍មួយបានកើតឡើង ដោយរថយន្តដឹកប្រេង ១គ្រឿងបានក្រឡាប់ ខណៈពេលដែល កំពុងបើកគេចរថយន្តឆ្លងកាត់ពីមុខ ១គ្រឿងទៀត បណ្តាលឲ្យផ្ងារជើង លើម៉ូតូកង់បី ១គ្រឿង ហៀប្រេងពេញផ្លូវ ផ្អើលប្រជាពលរដ្ឋនាំគ្នាមកដួសយកប្រេង ដោយមិនខ្លាចគ្រោះថ្នាក់ទាល់តែសោះ នៅវេលាម៉ោង២ និង៣០នាទី រសៀលថ្ងៃទី៣១ ខែសីហា ឆ្នាំ២០២៣ នេះ នៅចំណុចភូមិអណ្តូងជ្រោះ ឃុំអំពិល ស្រុកកំពង់សៀម ខេត្តកំពង់ចាម។ នេះបើយោងតាមផេក មន្ទីរព័ត៌មាន ខេត្តកំពង់ចាម។

តាមប្រភពព័ត៌មាន ពីប្រជាពលរដ្ឋ នៅតំបន់កើតហេតុ ឲ្យដឹងថា រថយន្តដឹកប្រេង របស់ក្រុមហ៊ុន សាគីម៉ីច ពាក់ស្លាកលេខ 4A-3981 ចំណុះ ៣២.០០០លីត្រ បើកបរទិសដៅពីកើតទៅលិច ។ លុះមកចំណុចកើតហេតុ លើផ្លូវបត់ចូលភ្នំស្រីភ្នំប្រុស រថយន្តនេះ បានបើកគេចរថយន្ត ១គ្រឿង ទៀត ដែលបំរ៉ុងបើកឆ្លងផ្លូវ បណ្តាលឲ្យក្រឡាប សង្កត់ម៉ូតូកង់បី ១គ្រឿង ប៉ុន្តែ មិនបណ្តាលឲ្យមនុស្សរងរបួសឡើយ ។

តាមការបញ្ជាក់ពី តៃកុង រថយន្តដឹកប្រេងនេះ បានឲ្យដឹងថា រថយន្តផ្ទុកប្រេងចំណុះ ៣២.០០០លីត្រ ក្នុងនោះ ប្រេងសាំង ៨.០០០លីត្រ និងប្រេងម៉ាសូត ២៤.០០០លីត្រ ។

ដោយឡែក ក្រោយពីកើតហេតុ គេសង្កេតឃើញប្រជាពលរដ្ឋ រស់នៅតំបន់នោះ បាននាំទាំងក្មេងទាំងចាស់ ខ្លះយកកាដុង និងខ្លះយកធុង មកដួសយកប្រេង ដែលហូរទៅលើផ្លូវនោះ ។

ជាមួយនោះ អាជ្ញាធរស្រុកកំពង់សៀម សហការកងកម្លាំងសមត្ថកិច្ច ចុះអន្តរាគមន៍សម្រួលចចារលើដងផ្លូវ និងបានឃាត់ប្រជាពលរដ្ឋ កុំឲ្យនាំគ្នា នៅក្បែររថយន្តដឹកប្រេងនោះ ដោយខ្លាចមានគ្រោះថ្នាក់ជាយថាហេតុ កើតឡើងណាមួយ ៕