ខេត្តកោះកុង ៖ មានករណីឆេះទូកដឹកឥវ៉ាន់ចាប់ហួយ មួយគ្រឿង នៅចំណុចមុខកន្លែងលក់ប្រេងឥន្ធនៈ ពូលីម យ៉ាងសន្ធោសន្ធៅ កាលពីវេលាម៉ោង ១និង៣០នាទី ថ្ងៃទី ១ ខែកញ្ញាឆ្នាំ ២០២៣ ស្ថិតនៅភូមិ៣ ឃុំបាក់ខ្លង ស្រុកមណ្ឌលសីមា ខេត្តកោះកុង ។ នេះបើយោងតាមផេក ស្នងការដ្ឋាននគរបាលខេត្តកោះកុង ។

សមត្ថកិច្ចបានឲ្យដឹងថា ករណីនេះ បានបណ្ដាលឲ្យមនុស្សរងរបួស ម្នាក់ជាប្រុស មានឈ្មោះ ណេត សុវណ្ណារ៉ា អាយុ៣៩ ឆ្នាំ មុខរបរតៃកុងទូក មានទីលំនៅនៅភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ ខេត្តកោះកុង និងខូចខាតទូកនឹងអីវ៉ាន់ដែលនៅលើទូកទាំងស្រុង។

ចំណែកមូលហេតុ មកពីជនរងគ្រោះ ចាក់ប្រេងហៀរលើម៉ាស៊ីនទូក ពេលម៉ាស៊ីនកំពុងបញ្ឆេះ ។

ក្រោយកើតហេតុ សមត្ថកិច្ចបានបញ្ជូនជនរងគ្រោះទៅព្យាបាលនៅមន្ទីរពេទ្យបង្អែកខេត្ត ៕