ខេត្តពោធិ៍សាត់ ៖ វីដេអូពីកាមេរ៉ាសុវត្ថិភាព ថតបានស្តែងៗ ខណៈរថយន្តដឹកអ្នកដំណើរមួយគ្រឿង បើកបរក្នុងល្បឿនលឿន ខណៈមេឃកំពុងភ្លៀង រអិលមកបុកសួនច្បារចែកទ្រូងផ្លូវ បែរទទឹងរថយន្តក្រឡាប់ផ្ងារជើងផ្ទប់នឹងបង្គោលភ្លើងមួយដើម សង្កត់មនុស្ស ជាប់ទាំងក្មេងតូចនៅខាងក្នុង ត្រូវបានប្រជាពលរដ្ឋ ស្រុះគ្នាណាស់ ស្រីៗប្រញាប់តេទូរសព្ទសុំការអន្តរាគមន៍ពីសមត្ថកិច្ចនិងរថយន្តសង្គ្រោះ ចំណែកបងៗប្រុសៗវិញ នាំគ្នាជួយលើកបំបះឡានដែលក្រឡាប់នេះ ឡើងលើដើម្បីជួយសង្គ្រោះមនុស្ស ភ្លាមៗសមត្ថកិច្ចស្រុកក្រគរ ក៏បានមកដល់ ជួយអន្តរាគមន៍ លើកជនរងគ្រោះដាក់រថយន្តទៅសង្គ្រោះអាយុជីវិត នៅមន្ទីរពេទ្យផងដែរ ។​

សូមបញ្ជាក់ថា ហេតុការណ៍នេះបានកើតឡើងនៅវេលាម៉ោង ៤និង៣០នាទីល្ងាច ថ្ងៃទី១ ខែកញ្ញា ឆ្នាំ២០២៣ លើកំណាត់ផ្លូវជាតិលេខ៥ ចន្លោះគីឡូម៉ែត្រ១៥០-១៥១ ត្រង់ចំណុចផ្លូវកោង ស្ថិតក្នុងភូមិឃ្លាំងមឿង ឃុំអន្លង់ត្នោត ស្រុកក្រគរ ខេត្តពោធិ៍សាត់។

សមត្ថកិច្ចបានឲ្យដឹងថា ករណីនេះ កើតឡើងខណៈមេឃកំពុងភ្លៀងរលឹមស្រិចៗ ពេលនោះក៏ មានរថយន្ដម៉ាក TOYOTA ហាយយ៉ាស មួយគ្រឿង ពណ៌ស ពាក់ផ្លាកលេខភ្នំពេញ2BC-8834 មានអ្នករួមដំណើរជាច្រើននាក់នៅខាងក្នុងរថយន្ត បើកបរពីលិច ទៅកើត ក្នុងល្បឿនលឿន លុះមកដល់ចំណុចកើតហេតុ (ផ្លូវកោង) ក៏បានរអិលរថយន្តក្រឡាប់ ជ្រុលទៅបុកសួនច្បារចែកទ្រូងផ្លូវបែរទទឹងរថយន្តក្រឡាប់ផ្ងារជើងផ្ទប់នឹងបង្គោលភ្លើងមួយដើម សង្កត់មនុស្ស ជាប់ទាំងក្មេងតូចនៅខាងក្នុង ត្រូវបានប្រជាពលរដ្ឋ នាំគ្នាជួយលើកបំបះឡានដែលក្រឡាប់នេះ ឡើងលើដើម្បីជួយសង្គ្រោះមនុស្ស ភ្លាមៗសមត្ថកិច្ចស្រុកក្រគរ ក៏បានមកដល់ ជួយអន្តរាគមន៍ លើកជនរងគ្រោះដាក់រថយន្តទៅសង្គ្រោះអាយុជីវិត នៅមន្ទីរពេទ្យផងដែរ ។ ក្នុងករណីនេះ មានជនរងគ្រោះម្នាក់ជាបុរសស្លាប់ និងមនុស្ស ៧នាក់ទៀតរងរបួសធ្ងន់ស្រាល ។

ក្រោយពេលកើតហេតុ លោកអភិបាលខេត្តពោធិ៍សាត់ ខូយ រីដា បានដឹកនាំកម្លាំងអន្តរាគមន៍ ជួយសង្គ្រោះភ្លាមៗ ដោយអ្នករបួសស្រាល ត្រូវបញ្ជូនទៅសង្គ្រោះនៅមន្ទីរពេទ្យបង្អែកស្រុកក្រគរ ដោយឡែកអ្នករបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តពោធិ៍សាត់។ចំណែកអ្នកបើកបរ បានរត់គេចខ្លួនភ្លាមៗ តាំងពីកើតហេតុភ្លាមមកម្ល៉េះ ខណៈរថយន្តវិញ ខ្ទេចស្ទើរទាំងស្រុង ត្រូវបានសមត្ថកិច្ចស្ទូចយកទៅរក្សាទុក រង់ចាំដោះស្រាយគ្នាពេលក្រោយតាមច្បាប់បន្តទៀត ។ ចំណែកសពដែលស្លាប់ម្នាក់ ត្រូវបានប្រគល់ឲ្យសាច់ញាតិធ្វើបុណ្យតាមប្រពៃណី ៕