រាជធានីភ្នំពេញ ៖ បុរសម្នាក់បើករថយន្តធុនធំមួយគ្រឿង ដឹកអង្ករ រេចង្កូតទៅបុកនឹងរបាំងថ្មចែកទ្រូងផ្លូវ បណ្ដាលឲ្យគាបជាប់ នៅក្នុងរថយន្ត សំណាងល្អត្រូវបានបងប្អូនប្រជាពលរដ្ឋជួយគាស់ចេញ ពីក្នុងរថយន្តដើម្បីជួយសង្គ្រោះ នៅតាមបណ្ដោយផ្លូវជាតិលេខ៥ ក្នុងសង្កាត់ឬស្សីកែវ ខណ្ឌឫស្សីកែវ រាជធានីភ្នំពេញ វេលាម៉ោង ៣ ទៀបភ្លឺ ត្រូវនឹងថ្ងៃទី៥ ខែកញ្ញា ឆ្នាំ២០២៣ ។

តាមសម្ដីសមត្ថកិច្ចបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តធុនៗមួយគ្រឿង ដែលពាក់ស្លាកលេខ ភ្នំពេញ 3B 2545 ធ្វើដំណើរតាមបណ្ដោយផ្លូវជាតិលេខ៥ ក្នុងទិសដៅពីជើងទៅត្បូង មកដល់ចំណុចកើតហេតុ ក៏បានរេចង្កូតទៅបុកនៅរបាំងថ្ម ចែកទ្រូងផ្លូវ បណ្ដាលឲ្យមនុស្សគាបជាប់នៅក្នុងរថយន្ត តែសំណាងល្អ ត្រូវបានបងប្អូនប្រជាពលរដ្ឋ ដែលនៅក្បែរនោះ ជួយគាស់ចេញពីក្នុងរថយន្តដឹកបញ្ជូនទៅមន្ទីរពេទ្យដើម្បីសង្គ្រោះបន្ទាន់។ ចំណែកឯរបាំងថ្មចែកទ្រូងផ្លូវវិញ រងការខូចខាតចំនួន៥ កង់ ខ្ទាតចេញពីកន្លែងដើម។

ក្រោយកើតហេតុ សមត្ថកិច្ចក៏បានមកដល់បានទំនាក់ទំនងទៅឲ្យសមត្ថកិច្ចជំនាញចរាចរណ៍នៃស្នងការនគរបាលរាជធានីភ្នំពេញ ធ្វើការវាស់វែងដើម្បីរង់ចាំការដោះស្រាយគ្នានៅពេលក្រោយ៕ Mrr Ka