រាជធានីភ្នំពេញ ​៖ ពិតជារន្ធត់ណាស់ សាច់ញាតិទ្រហ៊ោយំបោកខ្លួន ដាស់អង្រួនឲ្យក្រោកឡើង ខណៈមន្រ្តីពន្ធនាគារម្នាក់ ជិះម៉ូតូចេញពីធ្វើការទៅផ្ទះ ចាប់ហ្វ្រាំងបោកដួល ដួលខ្ទាតចូលរថយន្តមួយគ្រឿងទៀត ដែលកំពុងបើកស្របទិសគ្នាមកពីក្រោយ បុកប៉ះនិងកិនចំ មន្រ្តីពន្ធនាគារ ដែលជាអ្នកជិះម៉ូតូ បណ្តាលឲ្យស្លាប់ ក្រោយកើតហេតុ បានប្រមាណ ១៥នាទី​។

ហេតុការណ៍នេះបានបង្កការភ្ញាក់ផ្អើលកាលពីវេលាម៉ោង ៣និង ៣០នាទី រសៀលថ្ងៃទី៤ ខែកញ្ញា ឆ្នាំ២០២៣ ត្រង់ចំណុចមុខផ្លូវចូលមន្ទីរពេទ្យហ្លួងម៉ែ លើផ្លូវបេតុងព្រៃស ស្ថិតនៅក្នុងភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ។

តាមរបាយការណ៍ពីសមត្ថកិច្ចជំនាញ បានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង ដោយរថយន្ត HYUNDAI ពណ៌បៃតង ពាក់ស្លាកលេខ ភ្នំពេញ 3F-8169 បើកបរដោយឈ្មោះ លឹម ម៉េងឆាយ ភេទប្រុស អាយុ២៧ឆ្នាំ មុខរបរបើកបររថយន្ត រស់នៅភូមិកណ្តឹងធំ ឃុំកណ្តឹងធំ ស្រុកបាទី ខេត្តតាកែវ និងម៉ូតូ ម៉ាក HONDA PCX ពណ៌ស ពាក់ស្លាកលេខ ភ្នំពេញ 1IR .5060 បើកបរដោយឈ្មោះ បូ ទីនី ភេទប្រុស អាយុ៣៨ឆ្នាំ មុខរបរមន្រ្តីពន្ធនាគារ រស់នៅភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ បើកបរស្របទិសគ្នាពីលិចទៅកើត លុះមកដល់ចំណុចកើតហេតុ ម៉ូតូបានចាប់ហ្វ្រាំងបោកដួល ហើយត្រូវរថយន្តមកពីក្រោយ កិនចំតែម្តង មកពីភាគីរថយន្ត បើកបរខ្វះការប្រុងប្រយ័ត្ន បណ្តាលឲ្យស្លាប់ ក្រោយកើតហេតុ បានប្រមាណ ១៥នាទី​ ភ្លាមៗទាំងរថយន្តនិងអ្នកបើកបរត្រូវសមត្ថកិច្ចឃាត់ខ្លួនបានផងដែរ ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌដង្កោ សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យករថយន្តនិងម៉ូតូទៅរក្សាទុក រង់ចាំដោះស្រាយគ្នាតាមច្បាប់បន្តទៀត និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល វិចិត្រ