រាជធានីភ្នំពេញ ៖ រថយន្តព្រូស២គ្រឿង បើកបុកគ្នាពេញទំហឹង ម្ខាងផ្លោងឡើងលើសួនច្បារចែកទ្រូងផ្លូវ បាក់បង្គោលស្លាកសញ្ញាចរាចរណ៍ បណ្ដាលអោយរងការខូចខាតយ៉ាងដំណំ កាលពីវេលាម៉ោង ១យប់ ឈានចូលថ្ងៃទី៦ ខែកញ្ញា ឆ្នាំ២០២៣ នៅចំណុចតាមបណ្តោយផ្លូវភ្នំពេញហាណូយ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ​។

តាមសម្ដីសមត្ថកិច្ចបានឲ្យដឹងថា មុនពេលកើតហេតុ គេបានឃើញ រថយន្តព្រូសពណ៌ខ្មៅមួយគ្រឿង ធ្វើដំណើរតាមបណ្ដោយផ្លូវភ្នំពេញហាណូយ ក្នុងទិសដៅពីត្បូងទៅជើង មកដល់ចំណុចកើតហេតុ ក៏មានរថយន្តព្រូសពណ៌សមួយគ្រឿងទៀត បើកឆ្លងទទឹងផ្លូវ ក៏បានបុកគ្នាពេញមួយទំហឹង ធ្វើឲ្យរថយន្តព្រូសពណ៌ស ផ្លោងទៅលើសួនច្បារចែកទ្រូងផ្លូវ ត្រូវនឹងស្លាកសញ្ញាចរាចរណ៍បណ្ដាលឲ្យរកការខូចខាតយ៉ាងដំណំ។

ក្រោយកើតហេតុសមត្ថកិច្ចជំនាញចរាចរណ៍ផ្លូវគោក បានធ្វើកាវាស់វែង យករថយន្ដទាំង២គ្រឿងនេះ ទៅរក្សាទុកនៅឯស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាពេលក្រោយតាមច្បាប់បន្តទៀត ៕ Mrr Ka