រាជធានីភ្នំពេញ ៖ មានការភ្ញាក់ផ្អើលយ៉ាងខ្លាំង ខណៈប្រជាពលរដ្ឋ បានប្រទះឃើញ ឧត្តមសេនីយ៍ឯក យោធា ផ្កាយ៣ ម្នាក់ ស្លាប់ក្នុងរថយន្ត ដោយមិនទាន់ដឹងមូលហេតុ បង្កការភ្ញាក់ផ្អើលដល់សមត្ថកិច្ចជំនាញ មានទាំងសមត្ថកិច្ចជំនាញ ផ្នែកកោសល្យ ចុះមកហ៊ុំព័ទ្ធខ្សែពិនិត្យសព យ៉ាងយកចិត្តទុកដាក់ ។

ហេតុការណ៍នេះបានកើតឡើងនៅម៉ោង៦ល្ងាច ថ្ងៃទី៦ ខែកញ្ញា ឆ្នាំ២០២៣ នៅចំណុចផ្លូវវេងស្រេង ទល់មុខផ្សារឯករាជ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

តាមអត្តសញ្ញាណ នៅលើឯកសណ្ឋានជនរងគ្រោះដែលស្លាប់ ពាក់ជាប់ខ្លួន សពមានឈ្មោះ សាំង អូន ជាឧត្តមសេនីយ៍ឯក យោធា ផ្កាយ៣ នៅក្រសួងការពារជាតិ ដោយមានសាច់ញាតិ មកដល់ ទ្រហ៊ោយំបោកខ្លួនមិនអាចទទួលយកបាន ។

ក្នុងនោះបើតាមប្រភពពីប្រជាពលរដ្ឋនៅទីតាំងកើតហេតុ បានឲ្យដឹងថា មុនពេលកើតហេតុ គេឃើញលោក ឧត្តមសេនីយ៍ឯក យោធា ផ្កាយ៣ ខាងលើ បើករថយន្តមួយគ្រឿង ទិសដៅមកពីស្ពានអាកាសចោមចៅ ឆ្ពោះមកច្រមុះជ្រូកស្ទឹងមានជ័យ លុះដល់ចំណុចកើតហេតុ ក៏ឈប់រថយន្តមួយសន្ទុះធំ ពលរដ្ឋអើតមើល ឃើញដូចជាសម្រាន្តលក់ តែយូរៗទៅក៏សង្ស័យ នាំគ្នាគាស់កញ្ចក់ ដាស់ស្រែកហៅ តែមិនដឹងខ្លួនសោះ ក៏គាស់ទ្វា មានទាំងគ្រូពេទ្យជួយពិនិត្យ ទើបដឹងថាគាត់ស្លាប់ទៅហើយ ។

ពេលនេះសមត្ថកិច្ចជំនាញកំពុងធ្វើកោសល្យវិច័យ ដោយមិនទាន់ដឹងថា គាត់ស្លាប់ដោយសារខ្យល់គរ ឬក៏ស្លាប់ដោយសារជំងឺប្រចាំកាយនៅឡើយនោះទេ សូមចូលរួមរំលែកទុក្ខជាមួយក្រុមគ្រួសារសពផង ៕មេសា