រាជធានីភ្នំពេញ ៖ ភ្ញាក់ផ្អើលខ្លាំង ដោយប្រជាពលរដ្ឋ បានប្រទះឃើញសាកសពស្រ្តីវ័យចំណាស់ម្នាក់ អណ្តែតក្រោមស្ពានជ្រោយចង្វា ខណៈសាកសពមានសភាព ហើមធុំក្លិនស្អុយទៅហើយ ។
ហេតុការណ៍នេះបង្កអោយការភ្ញាក់ផ្អើលនាវេលាម៉ោង ៥ ល្ងាចត្រូវនឹងថ្ងៃទី៦ ខែកញ្ញា ឆ្នាំ២០២៣ ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
សមត្ថកិច្ចបានឲ្យដឹងថា ចំពោះសពស្រ្តីវ័យចំណាស់ខាងលើ នៅមិនទាន់អត្តសញ្ញាណនៅឡើយទេ ។
តាមប្រភពព័ត៌មាន បានឲ្យដឹងថា មុនពេលកើតហេតុ ប្រជាពលរដ្ឋម្នាក់ គាត់បានចុះទៅក្រោម មាត់ច្រាំង ដើម្បីយកខោអាវទៅបោក ខណៈនោះគាត់ក៏បានធុំក្លិនស្អុយ ទើបក្រឡេកមើលជុំវិញខ្លួន ក៏ប្រទះឃើញសាកសពមនុស្សស្រី ដេកផ្គាប់មុខអណ្តែតនៅក្រោម កំប្លោក ដែលហូរតាមទឹក ។ ទើបភ្លាមៗ គាត់បានឡើងទៅលើ រួចយកគល់ឈើកាយសពអោយចូលច្រាំង ដើម្បីរង់ចាំសមត្ថកិច្ចចុះមកធ្វើការត្រួតពិនិត្យ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកកន្លែងកើតហេតុ រួចបន្តទាក់ទងទៅសមត្ថកិច្ចជំនាញកោសល្យវិច្ច័យ ដើម្បីមកពិនិត្យសព និងបានបញ្ជាក់ថា សពស្លាប់ដោយសារលង់ទឹក និងស្វែងរកក្រុមគ្រួសារបន្ត ៕អែល មេសា
