រាជធានីភ្នំពេញ ៖ បុរសម្នាក់បើករថយន្ត Audio A7 ស៊េរីទំនើប មួយគ្រឿង បានបុកគ្នាជាមួយ ម៉ូតូYAMAHA XRIDE ក្នុងទិសដៅបញ្ច្រាសទិសគ្នា បណ្ដាលឲ្យម្ចាស់ម៉ូតូ រងរបួសធ្ងន់ ត្រូវបានបញ្ជូនទៅមន្ទីរពេទ្យ កាលពីវេលាម៉ោង ៩យប់ ថ្ងៃទី៧ ខែកញ្ញា ឆ្នាំ២០២៣ នៅតាមបណ្ដោយផ្លូវ២៦១ កែងផ្លូវ២៣០ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្ត Audio A7 ពាក់ស្លាកលេខ ភ្នំពេញ 2BY-0188 បើកតាមបណ្ដោយផ្លូវ ២៣០ ក្នុងទិសដៅពីត្បូងទៅជើង លុះមកដល់ផ្លូវបំបែកក៏បត់ និងបានបុកជាមួយម៉ូតូ Yamaha xride ពាក់ស្លាកលេខ ភ្នំពេញ 1IT-8770 ពេញមួយទំហឹង បណ្ដាលអោយរងរបួសធ្ងន់ ត្រូវបានបញ្ជូនទៅមន្ទីរពេទ្យ។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បានចុះមកវាស់វែងយករថយន្ដ និងម៉ូតូទៅរក្សាទុករង់ចាំការដោះស្រាយនៅពេលក្រោយតាមច្បាប់បន្តទៀត ៕ Mrr Ka
