រាជធានីភ្នំពេញ៖ ជនសង្ស័យ២នាក់ ជិះម៉ូតូឌុបគ្នា មកធ្វើសកម្មភាព លួចម៉ូតូមួយគ្រឿង ដែលម្ចាស់ភ្លេចខ្លួនទុកនៅខាងមុខផ្ទះ ដោយមិនបានដកសោរ បានសម្រេច ទោះបីជាមានប្រជាពលរដ្ឋបានឃើញស្រវ៉ាចាប់ទាញម៉ូតូ និងស្រែកឆោឡោ ផ្អើលដល់អ្នកជិតខាង ខ្លះទាញដំបង រត់ដេញតាមក៏មិនទាន់ ។
ហេតុការណ៍នេះបានកើតឡើង នៅវេលាម៉ោង ៩ និង ៤១នាទីព្រឹក ថ្ងៃទី៨ ខែកញ្ញា ឆ្នាំ២០២៣ នៅចំណុច ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមរយៈឃ្លីបវីដេអូកាមេរ៉ាសុវត្ថិភាពបង្ហាញឲ្យឃើញថា ជនសង្ស័យមានគ្នា២នាក់ ជិះម៉ូតូម៉ាកសង់មួយគ្រឿងឌុបគ្នា លុះដល់ចំណុចមុខផ្ទះជនរងគ្រោះ ក៏ឃើញម៉ូតូម៉ាក ហុងដាប៊ីតមួយគ្រឿង ពណ៌ក្រហម លាយស ម្ចាស់ភ្លេចខ្លួន មិនបានដកសោរចេញ ជាប់សោរស្រាប់ផង ក៏លួចបានសម្រេច រួចប្រញាប់ជិះរត់ ដោយមានប្រជាពលរដ្ឋបានឃើញស្រវ៉ាចាប់ទាញម៉ូតូ និងស្រែកឆោឡោ ផ្អើលដល់អ្នកជិតខាង ខ្លះទាញដំបង រត់ដេញតាមក៏មិនទាន់ លោកចោរជិះរត់បាត់ដោយសុវត្ថិភាព ខណៈជនរងគ្រោះបានត្រឹមមកដាក់ពាក្យបណ្តឹង នៅប៉ុស្តិ៍ ចោមចៅទី៣ ខណ្ឌពោធិ៍សែនជ័យ តែប៉ុណ្ណោះ ដើម្បីឲ្យសមត្ថកិច្ចជួយធ្វើការស្រាវជ្រាវ ៕ មេសា
