អន្តរជាតិ៖ សារព័ត៌មាន Reuters បានចេញផ្សាយនៅថ្ងៃទី២៧ ខែមេសា ឆ្នាំ២០២១ បានឲ្យដឹងថា ការប្រយុទ្ធគ្នាបានផ្ទុះឡើង នៅភាគខាងកើតប្រទេសមីយ៉ាន់ម៉ា នៅជិតព្រំដែនថៃ នៅព្រឹកថ្ងៃអង្គារនេះ ពេលក្រុមបះបោរជនជាតិភាគតិចការ៉ែន បានវាយប្រហារទីតាំងទ័ពរបស់របបយោធា នៅក្នុងការប៉ះទង្គិចគ្នាខ្លាំងបំផុតមួយ ចាប់តាំងពីរដ្ឋប្រហារថ្ងៃទី ១ ខែកុម្ភៈ បានធ្វើឱ្យប្រទេសមីយ៉ាន់ម៉ាធ្លាក់ចូលក្នុងវិបត្តិធ្ងន់ធ្ងរ។
ការប៉ះទង្គិចគ្នាបានកើតឡើងនៅពេលដែលរបបយោធានិយាយថា ខ្លួននឹងពិចារណាជាវិជ្ជមាន នូវសំណូមពររបស់សមាគមប្រជាជាតិអាស៊ីអាគ្នេយ៍(អាស៊ាន) ស្តីពីការបញ្ចប់ភាពវឹកវរនៅក្នុងប្រទេសមីយ៉ាន់ម៉ា ក្នុងការប្រជុំកាលពីចុងសប្តាហ៍នៅប្រទេសឥណ្ឌូនេស៊ី។
មេដឹកនាំអាស៊ីអាគ្នេយ៍បាននិយាយថា ពួកគេបានឈានដល់ការព្រមព្រៀងមួយ ជាមួយពួកយោធាស្តីពីជំហានដើម្បីបញ្ឈប់អំពើហិង្សានិងជំរុញកិច្ចពិភាក្សារវាងភាគីមីយ៉ាន់ម៉ាដែលជាគូប្រជែង។
សម្ព័ន្ធភាពជាតិការ៉ែន(KNU)ដែលជាកម្លាំងឧទ្ទាមចំណាស់ជាងគេរបស់ប្រទេសមីយ៉ាន់ម៉ា បាននិយាយថា ខ្លួនបានកាន់កាប់ជំរុំកងទ័ពនៅច្រាំងខាងលិចនៃដងទន្លេ Salween ដែលជាព្រំប្រទល់ជាមួយប្រទេសថៃនៅតំបន់នោះ។ អ្នកភូមិនៅតាមដងទន្លេថៃ បាននិយាយថា ការបាញ់កាំភ្លើងធុនធ្ងន់បានចាប់ផ្តើមមុនពេលថ្ងៃរះ។
ប្រធានកិច្ចការបរទេសរបស់ក្រុមលោក Saw Taw Nee បានប្រាប់រ៉យទ័រថា កម្លាំងរបស់ សម្ព័ន្ធភាពជាតិការ៉ែន(KNU) បានឈរជើងនៅប្រហែលម៉ោង ៥ ព្រឹកដល់ ៦ ព្រឹក (២២៣០ ដល់ ២៣៣០ GMT) ជំរំនេះត្រូវបានកាន់កាប់និងដុតបំផ្លាញ។ អ្នកនាំពាក្យរូបនេះបាននិយាយថា មានការប្រយុទ្ធគ្នានៅទីតាំងផ្សេងទៀតដែរ ប៉ុន្តែមិនបានផ្តល់ព័ត៌មានលម្អិតនោះទេ។
ក្រុមប្រព័ន្ធផ្សព្វផ្សាយរបស់មជ្ឈមណ្ឌលព័ត៌មានការ៉ែន បាននិយាយថា មូលដ្ឋានកងទ័ពត្រូវបានលុកលុយ។
កងទ័ពមីយ៉ាន់ម៉ាមិនបានធ្វើអត្ថាធិប្បាយភ្លាមៗនោះទេ។
ជាប្រវត្តិសាស្ត្រដែលបានប្រកាសខ្លួនថា ជាស្ថាប័នមួយដែលអាចរក្សាប្រទេសដែលមានជាតិចំរុះគ្នាជាង៥៣ លាននាក់ជាមួយគ្នា ទោះបីភាគច្រើននៃប្រទេសភូមា បានប្រមូលផ្តុំប្រឆាំងនឹងរដ្ឋប្រហាររបស់ខ្លួនក៏ដោយ។
គួររម្លឹកថា សម្ព័ន្ធភាពជាតិការ៉ែន(KNU) បានព្រមព្រៀងបទឈប់បាញ់គ្នានៅឆ្នាំ ២០១២ ដោយបញ្ចប់នូវកុបកម្មរបស់ពួកគេ សម្រាប់ស្វ័យភាព ដែលបានចាប់ផ្តើមភ្លាមៗ បន្ទាប់ពីទទួលបានឯករាជ្យពីចក្រភពអង់គ្លេសក្នុងឆ្នាំ១៩៤៨។ ប៉ុន្តែកម្លាំងរបស់ពួកគេ បានប៉ះទង្គិចជាមួយកងទ័ព ចាប់តាំងពីបានដណ្តើមអំណាច។
ក្រុមការ៉ែននិយាយថា មនុស្ស ២៤.០០០នាក់ ត្រូវបានផ្លាស់ទីលំនៅ ក្នុងសប្តាហ៍ថ្មីៗនេះ ដោយអំពើហិង្សា រួមទាំងការវាយប្រហារតាមអាកាសរបស់កងទ័ពអាកាសមីយ៉ាន់ម៉ា និងកំពុងជ្រកកោននៅក្នុងព្រៃ។
យោងតាមក្រុមសកម្មជន បាននិយាយថា កងកម្លាំងជនជាតិភាគតិចដែលមានមូលដ្ឋាននៅតំបន់ព្រំដែន បានគាំទ្រក្រុមអ្នកតវ៉ាប្រឆាំងនិងរបបយោធា ដែលមានមូលដ្ឋាននៅតាមទីក្រុងជាច្រើន ដែលកងកម្លាំងសន្តិសុខបានសម្លាប់ជនស៊ីវិលជាង៧៥០នាក់ ដែលធ្វើបាតុកម្មប្រឆាំងនឹងរដ្ឋប្រហារនេះ។
នៅកន្លែងផ្សេងទៀតនៅក្នុងប្រទេសមីយ៉ាន់ម៉ា មានរបាយការណ៍តិចតួចទាក់ទងនឹងការបង្ហូរឈាម ចាប់តាំងពីការប្រជុំចុងសប្តាហ៍រវាងមេដឹកនាំរបបយោធាលោក Min Aung Hlaing និងមេដឹកនាំអាស៊ីអាគ្នេយ៍ ដើម្បីព្យាយាមរកផ្លូវចេញពីវិបត្តិ។
បន្ទាប់ពីកិច្ចប្រជុំកាលពីចុងសប្តាហ៍ អាស៊ានបានចេញសេចក្តីយល់ស្រប៥ ចំណុច លើជំហានដើម្បីបញ្ឈប់អំពើហិង្សានិងផ្តួចផ្តើមពិភាក្សារវាងគូប្រជែងមីយ៉ាន់ម៉ា។
ក្រុមសកម្មជនបានរិះគន់ផែនការនេះ ដោយនិយាយថា វាបានជួយធ្វើឱ្យរបបយោធា មានភាពស្របច្បាប់។
ជាពិសេស មិនបានអំពាវនាវឲ្យមានការដោះលែងមេដឹកនាំជាប់ឆ្នោតលោកស្រី អ៊ុង សានស៊ូជី និងអ្នកទោសនយោបាយដទៃទៀតឡើយ។ សមាគមជំនួយសម្រាប់ក្រុមតស៊ូមតិអ្នកទោសនយោបាយនិយាយថា មនុស្សជាង៣.៤០០ នាក់ត្រូវបានឃុំខ្លួនពីបទប្រឆាំងរដ្ឋប្រហារ៕ ប្រភព៖ Reuters ប្រែសម្រួល៖ នង ណារិន
