វ៉ាស៊ីនតោន៖ សារព័ត៌មាន Channel News Asia នៅព្រឹកថ្ងៃទី២៨ ខែមេសា ឆ្នាំ២០២១ បានឲ្យដឹងថា ក្រុមសមាជិកព្រឹទ្ធសភាមួយរូប នៅថ្ងៃអង្គារទី២៧ ខែមេសា បានជំរុញឱ្យរដ្ឋបាលលោកបៃដិន ដាក់ទណ្ឌកម្មបន្ថែមទៀត ទៅលើរបបយោធាក្នុងប្រទេសមីយ៉ាន់ម៉ា រួមទាំងការបង្កក់ប្រាក់ចំណូលដល់ក្រុមហ៊ុនថាមពលរដ្ឋ ក្នុងការឆ្លើយតបទៅនឹងរដ្ឋប្រហាររបស់ខ្លួន និងការបង្ក្រាបដោយហិង្សាទៅលើក្រុមអ្នកតវ៉ា។
សមាជិកព្រឹទ្ធសភា Jeff Merkley អ្នកប្រជាធិបតេយ្យ និង Marco Rubio សមាជិកសភាមកពីសាធារណរដ្ឋ និង៤ នាក់ទៀតបានជំរុញឱ្យរដ្ឋលេខាធិការ Antony Blinken និងលេខាធិការរតនាគារ Janet Yellen នៅក្នុងលិខិតមួយដើម្បី«រិះរកមធ្យោបាយថ្មីៗ ដើម្បីគាំទ្រដល់ប្រជាជនភូមា ក្នុងការតស៊ូដើម្បីលទ្ធិប្រជាធិបតេយ្យនៅក្នុងប្រទេស ប្រឈមមុខនឹងឧក្រិដ្ឋកម្ម ដែលកំពុងកើនឡើងប្រឆាំងនឹងមនុស្សជាតិ»។
ពួកគេចង់ឲ្យរដ្ឋបាលបៃដិន បញ្ឈប់សួយសារអាករ ដែលហូរចេញពីធុរកិច្ច រួមមានក្រុមហ៊ុនប្រេង Chevron Corp ដ៏សំខាន់របស់សហរដ្ឋអាមេរិក ដល់សហគ្រាសប្រេង និងឧស្ម័នមីយ៉ាន់ម៉ា ឬ MOGE ដែលជាភ្នាក់ងារមួយ នៅក្នុងក្រសួងថាមពល។ MOGE ផ្តល់ការគាំទ្រផ្នែកហិរញ្ញវត្ថុ ដល់មេដឹកនាំយោធា រួមទាំងឧត្តមសេនីយ Min Aung Hlaing ដែលកំពុងស្ថិតក្រោមការដាក់ទណ្ឌកម្មរបស់សហរដ្ឋអាមេរិក។
ក្រុមសិទ្ធិមនុស្ស បានទទូចដល់ក្រុមហ៊ុនថាមពល រួមមានក្រុមហ៊ុន Chevron និងTotal ដើម្បីកាត់ផ្តាច់ទំនាក់ទំនងជាមួយមីយ៉ាន់ម៉ា បន្ទាប់ពីយោធាបានបណ្តេញរដ្ឋាភិបាល ដែលជាប់ឆ្នោតតាមបែបប្រជាធិបតេយ្យរបស់លោកស្រី អ៊ុង សានស៊ូជី កាលពីថ្ងៃទី១ ខែកុម្ភៈ ដោយបានឃុំខ្លួនលោកស្រីនិងបង្ក្រាបក្រុមបាតុករ។ ចាប់តាំងពីពេលនោះមកមនុស្សជាង ៧៥០នាក់ ត្រូវបានសម្លាប់។
សមាជិកព្រឹទ្ធសភា បាននិយាយថា ប្រាក់ចំណូលឧស្ម័នពីការបណ្តាក់ទុនរួមគ្នា ដែលពាក់ព័ន្ធនឹងក្រុមហ៊ុនដូចជាតូតាល់ និងChevron គឺជាប្រភពតែមួយនៃប្រាក់ចំណូលប្តូរប្រាក់បរទេសដ៏សំខាន់បំផុត សម្រាប់រដ្ឋាភិបាលមីយ៉ាន់ម៉ា ដែលបានផ្តល់នូវការទូទាត់ជាសាច់ប្រាក់ប្រហែល ១,១ ពាន់លានដុល្លារជារៀងរាល់ឆ្នាំ។
លិខិតនោះបានស្នើឱ្យក្រុមហ៊ុនបណ្តាក់ទុនវិនិយោគរកប្រាក់ចំណូល ទុកជាការទុកចិត្តមួយ ដែលត្រូវធ្វើឡើងរហូតដល់ប្រទេសមីយ៉ាន់ម៉ា មានរដ្ឋាភិបាលជាប់ឆ្នោតតាមបែបប្រជាធិបតេយ្យឬត្រូវប្រើសម្រាប់គោលបំណងមនុស្សធម៌។
អ្នកតំណាងក្រុមហ៊ុនChevron បាននិយាយថា ការបង្វែរប្រាក់ចំណូលឬពន្ធដែលជំពាក់ MOGE ទៅក្នុងគណនី escrow អាចត្រូវបានគេចាត់ទុកថា ជាការរំលោភកិច្ចសន្យា ហើយអាចធ្វើឱ្យនិយោជិករបស់ដៃគូបណ្តាក់ទុនរួមគ្នា ប្រឈមនឹងហានិភ័យនៃការកាត់ទោសព្រហ្មទណ្ឌ។
ក្រុមហ៊ុនChevron បានចំណាយថវិកាប្រមាណ ៥០លានដុល្លារអាមេរិក ដល់មីយ៉ាន់ម៉ា នៅចន្លោះឆ្នាំ ២០១៤ និង ២០១៨ នេះបើយោងតាមគំនិតផ្តួចផ្តើមតម្លាភាពឧស្សាហកម្មនិស្សារណកម្ម ដែលធ្វើការដើម្បីបង្កើនតម្លាភាពក្នុងអាជីវកម្មអន្តរជាតិ៕
ប្រភព៖ Channel News Asia ប្រែសម្រួល៖ នង ណារិន
