រាជធានីភ្នំពេញ ៖ ជនសង្ស័យម្នាក់ ធ្វើសកម្មភាព​ឆក់ទូរសព្ទដៃ ពីប្រជាពលរដ្ឋកំពុងធ្វើដំណើរតាមផ្លូវ ត្រូវបានប្រជាពលរដ្ឋស្ទាក់ជាប់ វាយចាស់ដៃ និងប្រញាប់រាយការណ៍ជូបសមត្ថកិច្ចប៉ុស្តិ៍ទំនប់ទឹក អធិការដ្ឋាននគរបាលខណ្ឌបឹងកេង ចុះមកធ្វើការឃាត់ខ្លួន យកទៅសាកសួរ។

ហេតុការណ៍នេះបានកើតឡើងកាលពីវេលាម៉ោង ១រសៀល ថ្ងៃទី១៩ ខែវិច្ឆិកា ឆ្នាំ២០២៣ នៅចំណុចមុខមន្ទីរពេទ្យហុងអ៊ិន​ ផ្លូវព្រះមុន្នីរ៉េត​ សង្កាត់​ទំនប់ទឹក​ ខណ្ឌបឹងកេងកង​​​ រាជធានីភ្នំពេញ​ ។

ការបង្ក្រាបនេះ គឺដោយអនុវត្តតាមបទបញ្ជារបស់លោកឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកវរសេនីយ៍ឯក ប៊ុន សត្យា ស្នងការរងទទួលផែនការងារព្រហ្មទណ្ឌ សមត្ថកិច្ចជំនាញ នៃអធិការដ្ឋាននគរបាលខណ្ឌបឹងកេងកង និងកម្លាំងនគរបាលប៉ុស្តិ៍រដ្ឋបាលទំនប់ទឹក បានធ្វើការបង្រ្កាបជាក់ស្តែង ពាក់ព័ន្ធនឹងករណី អំពើលួច​មានស្ថានទម្ងន់ទោស​ ​(​ឆក់ទូរស័ព្ទដៃ)​ ឃាត់ខ្លួនបានជនសង្ស័យឈ្មោះ ហ៊ុន​ លីណា ភេទប្រុស អាយុ១៩ឆ្នាំ​ មានទីលំនៅផ្ទះលេខ១១១ ផ្លូវBT សង្កាត់ស្ទឹងមានជ័យ២​ ខណ្ឌមានជ័យ​ មុខរបរ មិនពិតប្រាកដ​ (គ្មានសារធាតុ​ញៀន)​ ។

ក្នុងនោះ វត្ថតាងចាប់យករួមមាន៖ ម៉ូតូ​០១គ្រឿង​ ម៉ាកSUZUKI NEX ពណ៌ក្រហម​-ស​ សេរីឆ្នាំ​២០២៣​ ពាក់ផ្លាក់លេខ​ ភ្នំពេញ​ 1KD-7746 (របស់​ជនសង្ស័យ​), ទូរស័ព្ទ​ដៃ០១គ្រឿង​ ម៉ាក​IPhone 12Pro Max ពណ៌ទឹកមាស​ (ជារបស់ជនរងគ្រោះ)​ ​ហើយចំពោះទូស័ព្ទ​របស់ជនរងគ្រោះ​ សមត្ថកិច្ចបានប្រគល់អោយជនរងគ្រោះវិញ​ តាមពាក្យស្នើសុំ​ ។

បច្ចុប្បន្នជនសង្ស័យ និងវត្ថុតាងខាងលើ អធិការដ្ឋាននគរបាលខណ្ឌបឹងកេងកង កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕ មេសា