រាជធានីភ្នំពេញ ៖ គ្រោះថ្នាក់ចរាចរណ៍មួយបានកើតឡើង រវាងរថយន្ត​ Tesla បុកជាមួយរថយន្ត​ឡិចស៊ីស​ RX330 ដែលកំពុងឆ្លងផ្លូវ បណ្ដាលរងការខូចខាត​យ៉ាងដំណំ នៅ​តាមបណ្ដោយផ្លូវ​១០០៣​ សង្កាត់​ច្រាំង​ចំរេះ​ទី២​ ខណ្ឌ​ឬស្សីកែវ​ រាជធានីភ្នំពេញ វេលា​ម៉ោង​៨យប់​ ថ្ងៃ​ទី​២២​ ខែវិច្ឆិកា​ ឆ្នាំ​២០២៣។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្ត​ Tesla ស៊េរីទំនើបមួយគ្រឿង ដែលពាក់ស្លាកលេខ ភ្នំពេញ​ 2BX-5539 បើកតាមបណ្ដោយផ្លូវ១០០៣ ក្នុង​ទិសដៅ​ពី​ជើង​ទៅត្បូង មកដល់ចំណុចកើតហេតុ បើកមិនប្រយ័ត្នក៏បុករថយន្ត​ឡិចស៊ីស​ RX330 ដែលពាក់ស្លាកលេខភ្នំពេញ​ 2AL-2568 កំពុងឆ្លងផ្លូវបណ្ដាលរងការខូចខាតយ៉ាងដំណំ សំណាងល្អគ្មានអ្នករបួស ។

ក្រោយកើតហេតុ សមត្ថកិច្ចក៏បានមកដល់ បានឲ្យភាគីទាំងសងខាងដោះស្រាយគ្នាបញ្ចប់រឿងនៅហ្នឹងកន្លែងកើតហេតុ ៕ Mrr Ka