រាជធានីភ្នំពេញ ៖ យុវជន៣នាក់ជិះម៉ូតូ HONDA Dream មួយគ្រឿង ជ្រុលទៅបុករថយន្ដព្រូស រួចបន្តទៅបុករថយន្ដហាយឡែនឌ័រ បណ្ដាលឲ្យរងការខូចខាត បណ្តាលឲ្យយុវជន២នាក់រងរបួសធ្ងន់ ត្រូវបានបញ្ជូនទៅមន្ទីរពេទ្យ។
ហេតុការណ៍នេះកើតឡើងនៅតាមបណ្ដោយផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ វេលាម៉ោង៩យប់ ថ្ងៃទី២២ ខែវិច្ឆិកា ឆ្នាំ២០២៣។
យោងទៅតាមប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេបានឃើញយុវជនទាំង៣នាក់ ជិះម៉ូតូ HONDA Dream ពាក់ស្លាកលេខ ភ្នំពេញ 1KL-8026 ជិះឌុបគ្នាគេចពីគោលដៅសមត្ថកិច្ចអនុវត្តន៍ច្បាប់ចរាចរណ៍ បានជ្រុលទៅបុករថយន្ដព្រូស ពាក់ស្លាកលេខ ភ្នំពេញ 2BQ-6342 រួចបន្តទៅបុករថយន្ដហាយឡែនឌ័រ ពាក់ស្លាកលេខ រដ្ឋ19 2-0888 បណ្ដាលឲ្យរងការខូចខាត និងបណ្តាលឲ្យយុវជន២នាក់រងរបួសធ្ងន់ ត្រូវបានបញ្ជូនទៅមន្ទីរពេទ្យ។
ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ដទាំងពីរគ្រឿង និងម៉ូតូមួយគ្រឿងទៅរក្សាទុករង់ចាំការដោះស្រាយនៅពេលក្រោយ ៕ Mrr Ka
