រាជធានីភ្នំពេញ ៖ ជនសង្ស័យម្នាក់ បានធ្វើសកម្មភាពលួចអីវ៉ាន់កាលពីព្រឹកបានសម្រេចម្តងហើយ លុះរសៀលមកលួចម្តងទៀត ក៏ត្រូវបានប្រជាពលរដ្ឋឃាត់ខ្លួនប្រគល់ជូនសមត្ថកិច្ចតែម្តង។
ហេតុការណ៍នេះបង្កការភ្ញាក់ផ្អើល នាវេលាម៉ោង ១ រសៀលថ្ងៃទី២២ ខែវិច្ឆិកា ឆ្នាំ២០២៣ នៅត្រង់ចំណុចផ្លូវបេតុង ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ ។
តាមប្រភពព័ត៌មានបានអោយដឹងថា នៅមុនពេលកើតហេតុ នៅវេលាម៉ោង ០៩និង៣០នាទីព្រឹក ថ្ងៃទី ២២ ខែវិច្ឆិកា ឆ្នាំ២០២៣ គាត់បានយកអីវ៉ាន់មកដាក់លើកៅអីខាងមុខផ្ទះ រួចចូលយកអីវ៉ាន់បន្ថែម និងរងចាំគេមកយកអីវ៉ាន់ ដើម្បីដឹកអោយភ្ញៀវ ខណៈពេលគាត់ចូលទៅយកឥវ៉ាន់ នៅខាងក្នុងផ្ទះ បានបន្តិច ក៏ស្រាប់តែមានជនសង្ស័យបានមកលួចយកឥវ៉ាន់របស់គាត់ទៅបាត់ ។ ប៉ុន្តែលុះមកដល់រសៀលថ្ងៃដដែល វេលាម៉ោង ០១ ជនរងគ្រោះក៏បានប្រទះឃើញ ជនសង្ស័យដែលលួចកាលពីព្រឹក មកក្បែរផ្ទះគាត់ទៀត ទើបគាត់ស្រែកអោយជួយចាប់ នឹងឃាត់បានជនសង្ស័យភ្លាមៗ រួចទាក់ទងទៅសមត្ថកិច្ចដើម្បីយកជនសង្ស័យប្រគល់ជូនសមត្ថកិច្ច ។
បច្ចុប្បន្នជនសង្ស័យត្រូវបាន សមត្ថកិច្ចធ្វើការឃាត់ខ្លួន យកទៅសាកសួរនាំបន្តនៅអធិការដ្ឋាននគរបាលខណ្ឌសែនសុខ ៕ មេសា
