រាជធានីភ្នំពេញ​៖ យុវជនម្នាក់ ជិះម៉ូតូក្នុងល្បឿនលឿន ជ្រុលមកបុកជាមួយរថយន្តពេញទំហឹង បណ្តាលឲ្យស្លាប់យ៉ាងអាណោចអាធ័ម កាលពីវេលាម៉ោង ៩ និង ៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២៣ នៅចំណុចលើផ្លូវជាតិលេខ៣ ចន្លោះគីឡូម៉ែត្រលេខ ៥២-៥៣ ស្ថិតនៅក្នុងភូមិមានជ័យ ឃុំក្រាំងលាវ ស្រុកបាទី ខេត្តតាកែវ ។

តាមរបាយការណ៍ពីសមត្ថកិច្ចជំនាញ ដែលក្រុមការងារ TVFB ទទួលបាន បានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង រវាងរថយន្តម៉ាកហ៊ីយ៉ាន់ដាយ ពណ៌ស ពាក់ផ្លាកលេខ​ភ្នំពេញ​ 3F-3816 បានឈប់នៅលើចញ្ចើមផ្លូវជាតិ ស្របពេលនោះក៏មានម៉ូតូម៉ាកហុងដាសេ១២៥ពណ៌ខ្មៅ ពាក់ផ្លាកលេខ ពាក់ផ្លាកលេខ កំពង់ឆ្នាំង 1F-3884 ជិះដោយយុវជនម្នាក់ឈ្មោះ ហោ សុភ័ស្ត ភេទប្រុស អាយុ ១៩ឆ្នាំ (ពាក់មួកសុវត្ថិភាព) មុខរបរកសិករ​ មានទីលំនៅភូមិ ម្នាវ សង្កាត់​ស្រយ៉ូវ ក្រុងស្ទឹងសែន ខេត្តកំពង់ធំ ក្នុងទិសដៅពីត្បូង​ទៅជើង ដោយមានល្បឿនលឿន បានបុកចំពីក្រោយរថយន្តផ្នែកខាងឆ្វេង ពេញទំហឹង បណ្តាលឲ្យស្លាប់នៅនឹងកន្លែងតែម្តង ។ ចំណែកអ្នកបើករថយន្តឃើញដូចនោះ ក៏ប្រញាប់គេចចេញទៅបាត់ ។ ​

ពេលនេះ សពកំពុងស្វែងរកសាច់ញាតិដើម្បីយកទៅធ្វើបុណ្យតាមប្រពៃណី។ រីឯវត្ថុតាង រថយន្តនិងម៉ូតូ ត្រូវបានសមត្ថកិច្ចវាស់វែង យកមករក្សាទុកនៅអធិការដ្ឋាននគរបាលស្រុកបាទី ដើម្បីស្រាវជ្រាវនិងបំពេញបែបបទបន្តតាមនីតិវិធី៕ អែល វិចិត្រ