រាជធានីភ្នំពេញ​៖ សម្លេងសារ៉ែនរថយន្តលាន់រំពង ទាំងកណ្តាលយប់ រហូតដល់ព្រឹក បានបន្តចេញអន្តរាគមន៍បាញ់ពន្លត់ អគ្គិភ័យឆាបឆេះ នៅផ្សារបុរីសន្តិភាព២ យ៉ាងសន្ធោសន្ធៅ ខ្មួរខ្មាញ់ កាលពីវេលាម៉ោង ១២និង ៥០នាទីយប់ ឈានចូលថ្ងៃទី ២៨​ ខែវិច្ឆិកា ឆ្នាំ២០២៣ ចំណុចផ្លូវបេតុង ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ​ ដោយបានបំផ្លាញតូបលក់ដូរ អស់ជាង៤០០តូបឯណោះ ។ នេះបើយោងតាមផេក​ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

តាមរបាយការណ៍របស់សមត្ថកិច្ចបានបញ្ជាក់ថា ម្ចាស់ទីតាំង​ មានឈ្មោះ ស្រី ចាន់ថាត ភេទ​ ប្រុស អាយុ ៣៨​ ឆ្នាំ ជនជាតិ ខ្មែរ​ មុខរបរ​ ម្ចាស់ផ្សារ ខណៈមូលហេតុ នៃការឆាបឆេះនេះ សមត្ថកិច្ចកំពុងបន្តការស្រាវជ្រាវ ។

ភ្លាមៗ ដោយមានការអនុវត្តតាមបទបញ្ជារបស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានណែនាំដល់កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ត្រូវធ្វើការយកចិត្តទុកដាក់ខ្ពស់នៅក្នុងប្រតិបត្តិការជួយសង្គ្រោះប្រជាពលរដ្ឋឲ្យបានទាន់ពេលវេលា។

ដោយទទួលបានបទបញ្ជារបស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាល និងជាស្នងការនគរបាលរាជធានីភ្នំពេញ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានដឹកនាំបញ្ជាផ្ទាល់ដល់កងម្លាំងពន្លត់អគ្គិភ័យដែលប្រចាំការនៅគោលដៅ ដើម្បីចេញទៅជួយអន្តរាគមន៍បាញ់ទឹកពន្លត់ឲ្យទាន់ពេលវេលា កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។ កងកម្លាំង​បង្ការ​ពន្លត់​អគ្គិភ័យ​និង​សង្គ្រោះ​ បាន​ប្រើ​ប្រាស់​រថយន្តការិយាល័យអគ្គិភ័យ​ចំនួន ២០​ គ្រឿង ប្រើប្រាស់ទឹកអស់ចំនួន ២៤០​ រថយន្ត​ ស្មើរនឹង ៩៦០​ ម៉ែត្រគូប ។

+​ រថយន្តជំនួយ:

-​ រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ០១​ គ្រឿង ប្រើប្រាស់ទឹកអស់ចំនួន ០២​ រថយន្ត​ ស្មើនឹង ១២​ ម៉ែត្រគូប ។

-​ រថយន្តអគ្គិភ័យទីក្រុងនរាចំនួន ០២​ គ្រឿង ប្រើប្រាស់ទឹកអស់ចំនួន ០២​ រថយន្ត​ ស្មើនឹង ១២​ ម៉ែត្រគូប ។

-​ រថយន្តអគ្គិភ័យង៧០ចំនួន ០៥​ គ្រឿង ប្រើប្រាស់ទឹកអស់ចំនួន ០៩​ រថយន្ត​ ស្មើនឹង ៣៦​ ម៉ែត្រគូប ។

-​ រថយន្តអគ្គិភ័យទីក្រុងជ្រោយចង្វារចំនួន ០៦​ គ្រឿង ប្រើប្រាស់ទឹកអស់ចំនួន ០៨​ រថយន្ត​ ស្មើនឹង ៣២ម៉ែត្រគូប ។

ទើបរលត់ទៅវិញ នៅវេលាម៉ោង ០៨:០០ នាទីព្រឹក នាថ្ងៃខែ ឆ្នាំដដែល ដោយឆេះទីតាំង ប្រភេទដែកប្រក់ស័ង្កសី ទំហំ ៣២​ គុណ១០០​ ម៉ែត្រ ឆេះតូបក្នុងផ្សារចំនួន ៤១៩​ តូប អស់ទាំងស្រុង និងពុំបានឆេះរាលដាលដល់អ្នកក្បែរខាងឡើយ ៕