រាជធានីភ្នំពេញ ៖ ហេតុការណ៍គ្រោះថ្នាក់ចរាចរណ៍មួយ បានកើតឡើង ដោយរថយន្តស៊េរីទំនើបមួយគ្រឿង បើកបរដោយជនជាតិចិន បានបុកជាមួយម៉ូតូគេ នៅវេលាម៉ោងជាង ៦ព្រឹក ថ្ងៃទី២ ខែធ្នូ ឆ្នាំ២០២៣ ចំណុចក្បែរផ្សារទួលទំពូង រួចមិនឈប់ទទួលខុសត្រូវ ឬក៏ឈប់ដោះស្រាយនោះទេ បែរជាបើករថយន្តរត់គេចខ្លួន ។

ពេលនោះ ក៏មានសមត្ថកិច្ចនគរបាលចរាចរណ៍ខណ្ឌចំការមន បានជិះម៉ូតូដេញឃាត់រថយន្តខាងលើ តាំងពីចំណុចកើតហេតុក្បែរផ្សារទួលទំពូង រហូតមកដល់ចំណុចក្បែរផ្សារទំនើបអ៊ីអន១ ជនជាតិចិននោះ ក៏បានបើករថយន្ត បុកទាំងម៉ូតូសមត្ថកិច្ចចរាចរណ៍ទៀត បណ្តាលឲ្យដួលម៉ូតូរងរបួស រួចបន្តបើករត់ទៅមុខទៀត រត់ទាល់តែកង់ដាច់សំបក សល់តែយ៉ាន់ ទើបឃាត់បាន នៅចំណុចសួនច្បារមុខវត្តបុទុម សង្កាត់ចតុមុខ ខណ្ឌដូនពេញ ។

ពេលនេះចំពោះរថយន្តខាងលើ ត្រូវបានសមត្ថកិច្ចជំនាញចរាចរណ៍ធ្វើការស្ទូចយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីដោះស្រាយគ្នាតាមច្បាប់បន្តទៀត ៕ មេសា