រាជធានីភ្នំពេញ ៖ បុរសម្នាក់បើករថយន្តតាក់ស៊ីឯកជន ដឹកភ្ញៀវបរទេសចេញពីព្រលានយន្តហោះ បុកបង្កាន់ដៃស្ពានអាកាស៥ មករា លាន់ដូចរន្ទះ ឆេះរថយន្តយ៉ាងសន្ធោសន្ធៅ សំណាងមនុស្សរត់ចេញពីក្នុងរថយន្តទាន់ បណ្តាលឲ្យរបួសភ្ញៀវដែលជាជនបរទេស២នាក់ ត្រូវបានបញ្ជូនទៅកាន់មន្ទីរពេទ្យ ។

ហេតុការណ៍នេះបានកើតឡើងនៅស្ពានអាកាស ៥មករា ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ វេលាម៉ោង ១០យប់ ត្រូវថ្ងៃទី ៤ ខែធ្នូ ឆ្នាំ ២០២៣។

តាមប្រភពព័ត៌មាន ពីបងប្អូនប្រជាពលរដ្ឋ បានដឹងថា មុនពេលកើតហេតុ គេបានឃើញបុរសម្នាក់ បើករថយន្តព្រូស មួយគ្រឿង ដែលពាក់ស្លាកលេខ ភ្នំពេញ 2BE 7185 ដែលជារថយន្តតាក់ស៊ីឯកជន ដឹកភ្ញៀវ២នាក់ ចេញពីព្រលានយន្តហោះ តាមបណ្ដោយផ្លូវសហព័ន្ធរុស្ស៊ី មកដល់ចំណុចកើតហេតុ ក៏បានបុកបង្កាន់ដៃស្ពានអាកាស ៥មករា លាន់ដូចរន្ទះ បណ្ដាលឆេះរថយន្ដយ៉ាងសន្ធោសន្ធៅ និងបណ្ដាលឲ្យរងរបួសភ្ញៀវជនបរទេស២នាក់ ត្រូវបានបញ្ជូនទៅមន្ទីរពេទ្យ។

ភ្លាមៗនោះ កងកម្លាំងអន្តរាគមន៍បង្កា សង្គ្រោះ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានចុះមកធ្វើការបាញ់ពន្លត់ ខណៈអ្នកបើករថយន្តនោះ គេចខ្លួនបាត់ទៅហើយ ។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក បានវាស់វែង យករថយន្តខាងលើ ទៅរក្សាទុកនៅឯស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕ Mrr Ka