រាជធានីភ្នំពេញ ៖ ជនសង្ស័យ​ជាភេទទីបី និង គូស្នេហ៍ ធ្វើសកម្មភាពឆក់កាបូបជនបរទេស​ បានសម្រេច តែរត់មិនរួចពីកម្លាំងសមត្ថកិច្ចអធិការដ្ឋាននគរបាលខណ្ឌដូនពេញ ឃាត់បានទាំងពីរនាក់យកមកប៉ុស្តិ៍។

ហេតុការណ៍​នេះបានកើតឡើងនៅផ្លូវ១៣០ ​ក្នុងសង្កាត់​វត្តភ្នំ​ ខណ្ឌ​ដូនពេញ​ រាជធានីភ្នំពេញ វេលា​ម៉ោង​១២យប់ ត្រូវនឹងថ្ងៃ​ទី​២៨​ ខែមីនា​ ឆ្នាំ​២០២៤។

តាមប្រភពព័ត៌មានពីសមត្ថកិច្ច នៃអធិការនគរបាលខណ្ឌដូនពេញ បាននិយាយថា ជនសង្ស័យ២នាក់ ដែលជាគូស្នេហ៍នឹងគ្នា ម្នាក់ជាភេទទី៣ តែងខ្លួនធ្វើស្រី ឯម្នាក់ទៀតគឺជាប្រុស បានធ្វើសកម្មភាពរត់ទៅឆក់កាបូបរបស់ជនបរទេសកំពុងតែដើរតាមផ្លូវ នៅម្ដុំវត្តភ្នំ បានសម្រេច រួចរត់គេចខ្លួន ភ្លាមនោះកម្លាំងសមត្ថកិច្ចនៃអធិការដ្ឋាននគរបាលខណ្ឌដូនពេញ ធ្វើការតាមជនសង្ស័យទាំង២នាក់នោះ រហូតឃាត់បានទាំង២នាក់បញ្ជូនមកប៉ុស្តិ៍នគរបាលរដ្ឋបាលសង្កាត់វត្តភ្នំ ។

បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ចធ្វើការសាកសួរ និងកសាងសំណុំរឿងចាត់ការបន្តតាមនីតិវិធីច្បាប់ ៕ Mrr Ka