ខេត្តកំពត៖ ដោយបានការអនុញ្ញាតពីលោក មេបញ្ជាការ កងរាជអាវុធហត្ថខេត្តកំពត និងសម្របសម្រួលនីតិវិធីដោយ ឯកឧត្តម ជីវ ចាន់តារា ព្រះរាជអាជ្ញាអមសាលាដំបូងខេត្តកំពត នៅវេលាម៉ោង១៤:២០នាទី រសៀលថ្ងៃទី២៣ ខែមីនា ឆ្នាំ២០២៤ កម្លាំងជំនាញមន្ទីរស្រាវជ្រាវ និងបង្ក្រាបបទល្មើស កងរាជអាវុធហត្ថខេត្តកំពត និង អង្គភាពនគរបាលយុត្តិធម៌ សហការជាមួយមូលដ្ឋានកងរាជអាវុធហត្ថក្រុងកំពត ដឹកនាំដោយលោកវរសេនីយ៍ឯក សេង វិច្ឆិកា មេបញ្ជាការរង ទទួលជំនាញគ្រឿងញៀន បានចុះបង្ក្រាបមុខសញ្ញាជួញដូរ និងប្រើប្រាស់ដោយខុសច្បាប់នូវសារធាតុញៀន នៅចំណុចភូមិទ្វីខាងត្បូង សង្កាត់អណ្តូងខ្មែរ ក្រុងកំពត ខេត្តកំពត ។ នេះបើយោងតាមផេកផ្លូវការរបស់ បញ្ជាការដ្ឋានកងរាជអាវុធហត្ថខេត្តកំពត ។

ប្រតិបត្តិការនេះ កម្លាំងជំនាញឃាត់ខ្លួនជនសង្ស័យបានម្នាក់ ឈ្មោះ Claridge John William lane ភេទប្រុស អាយុ៥៣ឆ្នាំ ជនជាតិ England មុខរបរមិនពិតប្រាកដ រស់នៅភូមិទ្វីខាងត្បូង សង្កាត់អណ្តូងខ្មែរ ក្រុងកំពត ខេត្តកំពត (ជួញដូរគ្រឿញៀន)។

ក្នុងនោះវត្ថុតាងចាប់យករួមមាន៖

- គ្រឿងញៀនចំនួន០៧កញ្ចប់០១កញ្ចប់ធំនិង០៦កញ្ចប់តូច (ទម្ងន់១៨.០០ក្រាម) ថ្លឹងទាំងសំបកថង់។

- គ្រឿងញៀនប្រភេទម្សៅស(K) (ទម្ងន់០.៦៤ក្រាម) ថ្លឹងទាំងសំបកថង់។

- កញ្ឆាក្រៀមចំនួន០៦កញ្ចប់(ទម្ងន់២២.៨១ក្រាម) ថ្លឹងទាំងសំបកថង់។

- ម៉ូតូចំនួន០២គ្រឿង។

- ទូរស័ព្ទចំនួន០១គ្រឿង។

- ជញ្ជីងថ្លឹងគ្រឿងញៀនចំនួន ០២។

- ថង់ច្រកគ្រឿងញៀនមួយចំនួន។

- ឧបករណ៍ប្រើប្រាស់គ្រឿងញៀនមួយចំនួន។

ក្នុងពេលឃាត់ខ្លួនជនសង្ស័យ សមត្ថកិច្ចយើងបានធ្វើតេស្តរហ័សរកមេរោគកូវីដ១៩(លទ្ធផលអវិជ្ជមាន)។ បច្ចុប្បន្ន ជនសង្ស័យនិងវត្ថុតាង ត្រូវបានឃាត់ខ្លួននៅមន្ទីរស្រាវជ្រាវនិងបង្ក្រាបបទល្មើស ដើម្បីចាត់ការតាមនីតិវិធីច្បាប់ ៕