ខេត្ត​ពោធិ៍សាត់ ៖ ហេតុការណ៍គ្រោះថ្នាក់មួយ បានបង្កការឲ្យមានការភ្ញាក់ផ្អើលជាខ្លាំង ខណៈរូបភាពកាមេរ៉ាសុវត្ថិភាព បង្ហាញស្តែង ឃើញរថយន្តមួយគ្រឿង ជាប្រភេទរថយន្តដឹកអ្នកដំណើរ បើកឆ្លងកាត់ផ្លូវរថភ្លើង ក៏ត្រូវរថភ្លើងបុករុញខ្ទាតទាំងកម្រោល ក្រឡាប់អូសជាច្រើនម៉ែត្រ ស្រុញចូលគ្នា ផ្អើលអ្នកភូមិជួយសង្គ្រោះយកមនុស្សចេញមកខាងក្រៅ ។

ហេតុការណ៍នេះបានកើតឡើងនៅភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ វេលាម៉ោង ១១និង ២០នាទីថ្ងៃត្រង់ ទី២៩ ខែមីនា ឆ្នាំ២០២៤នេះ ។ នេះបើយោងតាមរបាយការណ៍របស់ Hotline 117 ប្រចាំបញ្ជារបស់អគ្គស្នងការដ្ឋាននគរបាលជាតិ ។

បើតាមរបាយការណ៍ដដែលបានឲ្យដឹងថា រថភ្លើងធ្វើដំណើរពីកើតទៅលិច ចំណែករថយន្តដែលជួបគ្រោះថ្នាក់នេះ ជាប្រភេទរថយន្តដឹកអ្នកដំណើរ ធ្វើដំណើរពីជើងទៅត្បូង បណ្តាលឲ្យមនុស្ស ៤៥នាក់ របួសធ្ងន់ស្រាល ក្នុងនោះមានស្រី ២៥នាក់ ត្រូវបានកម្លាំងជំនាញចុះទៅដល់ សម្រួលចរាចរណ៍ បញ្ជូនជនរងគ្រោះទៅមន្ទីរពេទ្យ ដើម្បីធ្វើការវាស់វែង យកមធ្យោបាយទាំង២គ្រឿង ទៅរក្សាទុក រង់ចាំដោះស្រាយគ្នាពេលក្រោយតាមច្បាប់ ។

ទោះបីជាយ៉ាងណាចំពោះករណីនេះ សមត្ថកិច្ចមិនទាន់បញ្ជាក់ពីមូលហេតុនៅឡើយ ថាបណ្តាលមកពីអ្វី ៕ នុច