ខេត្តកណ្តាល ៖ រថយន្តបែនដឹកខ្សាច់មួយគ្រឿង បានបុកខឿនរង្វង់មូលគល់ស្ពានព្រែកសំរោង ក្រឡាប់ផ្ងារជើង ចាក់ខ្សាច់ចោលពេញផ្លូវ ។

ហេតុការណ៍នេះបានកើតឡើងនៅវេលាម៉ោង ៨និង១៥នាទីព្រឹក ថ្ងៃទី៣០ ខែមីនា ឆ្នាំ២០២៤ នៅរង្វង់មូលគល់ស្ពានព្រែកសំរោង ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។

តាមប្រភពបានឲ្យដឹងថា មុនកើតហេតុ គេបានឃើញរថយន្តបែនដឹកខ្សាច់មួយគ្រឿង ពណ៌ស ពាក់ស្លាកលេខ ចង្កូតស្តាំ PP-3613 បើកចុះពីលើស្ពានព្រែកសំរោង ក្នុងទិសដៅពីកើតទៅលិច ដាច់ហ្វ្រាំង ក៏បុករង្វង់មូលគល់ស្ពានព្រែកសំរោងផ្នែកខាងលិច បណ្តាលឲ្យក្រឡាប់ផ្ងារជើង ចាក់ខ្សាច់ចោលពេញផ្លូវ រងខូចខាតតែម្តង ។

ក្រោយកើតហេតុ សមត្ថកិច្ចបានធ្វើការស្ទូចយករថយន្តទៅរក្សាទុកនៅអធិការដ្ឋានក្រុងតាខ្មៅ រងចាំ ដោះស្រាយគ្នាបន្តទៀត ៕ អែល វិចិត្រ