ខេត្តសៀមរាប ៖ អគ្គិភ័យបានឆាបឆេះស្ថានីយ៍ប្រេងឥន្ទនៈមួយកន្លែង យ៉ាងសន្ធោសន្ធៅ រាលដាលដល់ផ្ទះប្រជាពលរដ្ឋ និងមានអ្នករងរបួសស្រាល ផ្អើលរថយន្តពន្លត់អគ្គិភ័យ ជាច្រើនគ្រឿង ចុះទៅអន្តរាគមន៍បាញ់ពន្លត់ ។

ហេតុការណ៍នេះបានកើតឡើងកាលពីវេលាម៉ោង ៧និង ៣០នាទីយប់ ថ្ងៃទី២ ខែមេសា ឆ្នាំ២០២៤ នៅចំណុចភូមិចំបក់ហែ ឃុំពួក ស្រុកពួក ខេត្តសៀមរាប ។

តាមប្រភពព័ត៌មាន បានឲ្យដឹងថា មុនពេលកើតហេតុការណ៍នេះ មានរថយន្តដឹកប្រេងសាំងមួយគ្រឿង ចំណុះ៣២ពាន់លីត្រ មានប្រេងសាំងចំណុះ ៨ពាន់លីត្រ ចូលមកដាក់ប្រេងនៅកន្លែងកើតហេតុខាងលើ ។ លុះពេលបង្ហូរប្រេងចូលក្នុងស៊ីទែនកប់ក្នុងដីបានប្រហែល១៥នាទី ស្រាប់តែមានអគ្គិភ័យឆាបឆេះ។ ពេលនោះតៃកុងរថយន្តដឹកប្រេងសាំង បានឡើងបើករថយន្តចេញពីចំណុចកើតហេតុទៅទាំងភ្លើងកំពុងឆេះទុយោរ បង្ហូរសាំងគ្រវីគ្រវាត់លើផ្លូវ បន្ទាប់មកក៏រលត់ទៅវិញ ។ ប៉ុន្តែនៅកន្លែងកើតហេតុក្នុងស្ថានីយ៍ប្រេងឥន្ធនៈ ភ្លើងចាប់ផ្តើមឆេះសន្ធោរសន្ធៅខ្លាំងទៅៗ រាលឆ្លងឆាបឆេះទៅផ្ទះជាប់គ្នា ។

ភ្លាមៗកម្លាំងអធិការដ្ឋាននគរបាលស្រុកពួក សហការជាមួយកម្លាំងរថយន្ត បង្កាពន្លត់អគ្គីភ័យនៃស្នងការនគរបាលខេត្តសៀមរាប រួមទាំងកម្លាំងប្រជាការពារភូមិ បងប្អូនប្រជាពលរដ្ឋ បានចេញជួយអន្តរាគមន៍ ដោយមានវត្តមានរបស់លោក ប្រាក់ សោភ័ណ អភិបាលនៃគណៈអភិបាលខេត្ត និង លោកនាយករដ្ឋបាលសាលាខេត្ត ក៏បានចុះពិនិត្យស្ថានភាពអគ្គីភ័យនេះផងដែរ ។

ក្នុងរង្វង់ប្រតិបត្តិការនេះ សមត្ថកិច្ចបានប្រើប្រាស់រថយន្តពន្លត់ អគ្គីភ័យចំនួន៨គ្រឿង ក្នុងនោះមាន រថយន្តពន្លត់អគ្គីភ័យរបស់ស្នង ការដ្ឋាននគរបាលខេត្តសៀមរាប ចំនួន៤គ្រឿង ,រថយន្តពន្លត់អគ្គីភ័យរបស់អធិការដ្ឋាននគរបាលស្រុកពួក ចំនួន១គ្រឿង , រថយន្តពន្លត់អគ្គីភ័យរបស់អធិការដ្ឋាននគរបាលស្រុកក្រឡាញ់ ចំនួន០១គ្រឿង ,រថយន្តពន្លត់អគ្គីភ័យរបស់អធិការដ្ឋាននគរបាលស្រុកអង្គរជុំ ចំនួន ១គ្រឿង និងរថយន្តពន្លត់អគ្គីភ័យរបស់អង្គភាពនគរ បាលការពារបេតិកភ័ណ្ឌ ចំនួន០១គ្រឿង ប្រើប្រាស់ទឹកអស់សរុបចំនួន ២៩រថយន្ត ទើបរលត់ទៅវិញនៅវេលាម៉ោង ២១និង២០នាទី បណ្តាលឲ្យរងរបួសស្រាលម្នាក់ ជាកម្មករធ្វើការនៅទីនោះ ខូចខាតស្ថានីយ៍ ឆេះសាំង និង គ្រឿងទេសនិងភេសជ្ជៈ ដែលតាំងលក់និងនៅក្នុងឃ្លាំងទាំងស្រុង។ ចំណែកអ្នកបើកបររថយន្តដឹកប្រេង ក៏ត្រូវបានកម្លាំងនគរបាលជំនាញឃាត់ខ្លួនយកទៅសាកសួរ និងរៀបចំកសាងសំណុំរឿងបញ្ជូនទៅកាន់ការិយាល័យជំនាញ ចាត់ការតាមនីតិវិធីច្បាប់ ៕ នុច