ខេត្តកណ្តាល៖ ២នាក់បងប្អូន ផ្លោងបត់កស្លាប់គរលើគ្នា ទាំង២នាក់យ៉ាងរន្ធត់ ខណៈកំពុងជិះម៉ូតូក្នុងល្បឿនលឿន សង្ស័យងងុយដេក រេចង្កូតបុកផ្ទប់ជញ្ជាំងផ្ទះប្រជាពលរដ្ឋ ពេញទំហឹង ។

ហេតុការណ៍ដ៍រន្ធត់នេះបានកើតឡើង នៅវេលាម៉ោ៧និង២០នាទីព្រឹកថ្ងៃទី០៥ ខែមេសា ឆ្នាំ២០២៤ ស្ថិតនៅតាមបណ្តោយផ្លូវជាតិលេខ៥ ឃុំព្រែកតាទែន ស្រុកពញាឮ ខេត្តកណ្តាល។

បើតាមការបញ្ជាក់ពីពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូម៉ាកហុងដាឌ្រីមសង់សេ១២៥ ពណ៌ខ្មៅ មួយគ្រឿង ពាក់ផ្លាកលេខ ភ្នំពេញ 1IQ-6793 ជិះដោយបុរសម្នាក់ និងស្រ្តីម្នាក់ទៀត ត្រូវជាបងប្អូននិងគ្នា ធ្វើដំណើរតាមបណ្តោយផ្លូវជាតិលេខ៥

បំណងដឹកត្រីទៅលក់ លុះដល់ចំនុចកើតហេតុ​សង្ស័យអ្នកឌុបងងុយដេក ស្រាប់តែគេឃើញរេចង្កូតជ្រុលទៅបុកចូលផ្ទះប្រជាពលរដ្ឋទាំងកំរោល បោកផ្ទប់នឹងជញ្ជាំងផ្លោង បត់កស្លាប់គរលើគ្នា ទាំង២នាក់យ៉ាងរន្ធត់តែម្តង ។

បន្ទាប់ពីកើតហេតុ ក៏មានសមត្ថកិច្ចមូលដ្ឋានចុះមកដល់ក៏បានទាក់ទងទៅខាងជំនាញចរាចរណ៍បន្តឲ្យចុះមកវាស់វែងយកម៉ូតូទៅរក្សាទុក ស្រាវជ្រាវបន្ត ។ ចំណែកឯសពសមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕ អែល មេសា