ខេត្តបន្ទាយមានជ័យ ​ ៖ ជនសង្ស័យចំនួន ១២៤នាក់ រួមទាំងវត្ថុតាងគ្រឿងញៀនមួយចំនួនធំ និងម៉ូតូរួមទាំងរថយន្តសរុបចំនួន ៤១គ្រឿង ត្រូវបានដកហូត ក្នុងប្រតិបត្តិការបង្ក្រាបគ្រឿងញៀន នៅKTV ឡាំបូគីនី ។ នេះបើយោងតាមផេក ការិយាល័យព្រហ្មទណ្ឌកម្រិតស្រាល ខេត្តបន្ទាយមានជ័យ បានបង្ហោះនៅថ្ងៃទី៦ ខែមេសា ឆ្នាំ២០២៤នេះ ។

សមត្ថកិច្ចបានបញ្ជាក់ថា នៅថ្ងៃទី០៥ ខែមេសា ឆ្នាំ២០២៤ ម៉ោង ០១និង ៣០នាទី កម្លាំងព្រហ្មទណ្ឌកម្រិតស្រាល ចុះសហការជាមួយជំនាញពាក់ព័ន្ធ ដឹកនាំដោយលោកឧត្តមសេនីយ៍ទោ ស្នងការ ចុះបង្រ្កាបទីតាំង KTV ឡាំបូគីនី នៅចំណុចភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ឃាត់ខ្លួនមនុស្សសរុប ១២៤នាក់ ស្រី ៥៧នាក់ បរទេស ៦៣នាក់ ដោយដកហូតបានវត្ថុតាង ថ្នាំកញ្ចប់រូបផ្លែត្របែក ១៣កញ្ចប់ រូបទំពាំងបាយជូរ ១៣កញ្ចប់ ថ្នាំកញ្ចប់ពណ៌ក្រហម ២កញ្ចប់ ថ្នាំកញ្ចប់រូបពណ៌ទឹកមាស ៣កញ្ចប់ ថ្នាំគ្រាប់ ពណ៌ផ្កាឈូក ២៣គ្រាប់ ថ្នាំគ្រាប់ពណ៌ខៀវ ១៩គ្រាប់ ម្សៅម៉ត់ស ៥ថង់តូច បារីអេឡេត្រូនីច ១២ និងឧបរកណ៍សំរាប់ប្រើប្រាស់គ្រឿងញៀនមួយចំនួន និងម៉ូតូ ៣៩គ្រឿង រថយន្ត០២គ្រឿង ៕