ខេត្តព្រះវិហារ ៖ គេគ្រប់គ្នាមកសង្ក្រាន្ត ដើម្បីសប្បាយអបអរឆ្នាំថ្មី តែពួកនេះ មកសង្ក្រាន្ត បែរជាដេញវាយគ្នាយ៉ាងអាណាធិបតេយ្យ អុកឡុកក្នុងកម្មវិធីសង្ក្រាន្តឆ្នាំថ្មីនៅស្រុកគូលែន ត្រូវសមត្ថកិច្ចបង្ក្រាបបាន ។ នេះបើយោងតាមផេក ស្នងការដ្ឋាននគរបាលខេត្តព្រះវិហារ ។

សមត្ថកិច្ចបានឲ្យដឹងថា កាលពីវេលាម៉ោង ៣និង ៥០នាទីរសៀល ថ្ងៃទី១០ ខែមេសា ឆ្នាំ២០២៤ មានករណីក្រុមក្មេងទំនើងធ្វើសកម្មភាពប្រើដំបង ដុំឥដ្ឋដេញវាយគ្នា និងអុកឡុកក្នុងកម្មវិធីសង្ក្រាន្តឆ្នាំថ្មីនៅចំណុចសាលាវិទ្យាល័យហ៊ុនសែនគូលែនភូមិ គូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។

សមត្ថកិច្ចបានឲ្យដឹងទៀតថា យុវជនក្មេងៗនេះ បាននាំគ្នាជិះម៉ូតូ៣០ ទៅ៤០គ្រឿងពីស្រុកត្បែងមានជ័យ និងក្រុងព្រះវិហារ ដើម្បីចូលរួមកម្មវិធីខាងលើនេះ ហើយក៏ផ្ទុះអំពើហិង្សាជាមួយយុវជនមូលដ្ឋាន ត្រូវបានសមត្ថកិច្ចបង្រ្កាបបាន៣នាក់ និងជាច្រើននាក់ទៀតត្រូវបានរត់គេចខ្លួន ៕