រាជធានីភ្នំពេញ ៖ រន្ធត់ណាស់ យុវជនម្នាក់ របួសធ្ងន់ដេកដួលក្នុងថ្លុកឈាម ខណៈជិះម៉ូតូមិនប្រយត្ន័ ទៅបុករថយន្តក្រុមហ៊ុនស៊ីនទ្រីកំពុងបោសសំអាតតាមដងផ្លូវ ពេញទំហឹង ។

ហេតុការណ៍នេះបានកើតឡើងកាលពីវេលាម៉ោង ៥ និង៤០នាទីទៀបភ្លឺ ឈានចូលថ្ងៃទី២៣ ខែមេសា ឆ្នាំ២០២៤ នៅចំណុចក្បែរច្រកចូលបុរីប៉េងហួត តាមផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ ។

តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញយុវជនម្នាក់ ជិះម៉ូតូមួយគ្រឿង ម៉ាកគប់ ពាក់ស្លាកលេខ ភ្នំពេញ 1JU-2750 ក្នុងទិសដៅពីកើតមកលិចលុះដល់ចំណុចកើតហេតុ មិនប្រយត្ន័ ក៏បុករថយន្ត ក្រុមហ៊ុនស៊ីនទ្រីកំពុងបោសសំអាតតាមដងផ្លូវចំចែងខាងស្តាំពេញទំហឹង បណ្តាលឲ្យរបួសធ្ងន់ធ្ងរដេកដួលក្នុងថ្លុកឈាមយ៉ាងរន្ធត់ ត្រូវបាននគរបាលប៉ុស្តិ៍និរោធ ទាក់ទងហៅរថយន្តសង្គ្រោះរបស់មន្ទីរពេទ្យបង្អែកខណ្ឌច្បារអំពៅ មកដឹកយកជណរងគ្រោះទៅសង្គ្រោះបន្ទាន់នៅឯមន្ទីរពេទ្យកាល់ម៉ែត ដោយសារអាការៈធ្ងន់ធ្ងរពេក ។

ក្រោយកើតហេតុ សមត្ថកិច្ចនគរបាលខណ្ឌច្បារអំពៅ សហការជាមួយនគរបាលចរាចរណ៍ក្រុង ចុះធ្វើការវាស់វែង យករថយន្តនិងម៉ូតូ ទៅរក្សាទុក រង់ចាំដោះស្រាយគ្នាពេលក្រោយតាមច្បាប់បន្តទៀត ៕ អត្ថបទ និងរូបភាពដោយលោក អែល វិចិត្រ
(ហាមចម្លងយករូបភាព និងអត្ថបទរបស់ TVFB ដោយគ្មានការអនុញ្ញាត)