រាជធានីភ្នំពេញ ៖ បុរសម្នាក់បើករថយន្តឡិចស៊ីស RX330 មួយគ្រឿង ជ្រុលចង្កូតទៅបុកតូប និងរោងលក់សាច់ពិសេស បណ្ដាលឲ្យរងការខូចខាតយ៉ាងដំណំ។

ហេតុការណ៍នេះកើតឡើងនៅតាបណ្ដោយផ្លូវសម្ដេចជាស៊ីម ដែលស្ថិតនៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ នាវេលាម៉ោង២យប់ ត្រូវថ្ងៃទី២៣ ខែមេសា ឆ្នាំ២០២៤ ។

តាមប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចបានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្តឡិចស៊ីស RX330 មួយគ្រឿង ដែលពាក់ស្លាកលេខ ភ្នំពេញ 2AS 9353 ធ្វើដំណើរតាមបណ្ដោយផ្លូវសម្ដេចជាស៊ីម ក្នុងទិសដៅពីកើតមកលិច មកដល់ចំណុចកើតហេតុផ្លូវបំបែក ជ្រុលចង្កូតទៅបុកចូលទៅលក់សាច់ពិសេស និងតូប បណ្ដាលឲ្យរថយន្តធ្លាក់ចូលប្រឡាយគឿងជាប់បះជើងរងការខូចខាតយ៉ាងដំណំ។

ក្រោយពេលកើតហេតុសមត្ថកិច្ចក៏បានឲ្យអ្នកបើករថយន្តខាងលើ ធ្វើការដោះស្រាយជាមួយនឹងម្ចាស់ផ្ទះ ដើម្បីបញ្ចប់រឿងនៅហ្នឹងកន្លែងកើតហេតុ ៕ Mrr Ka