រាជធានីភ្នំពេញ ៖ រថយន្តព្រូសមួយគ្រឿង បានបើកជ្រុលល្បឿនទៅបុក រម៉កពីក្រោយ រួចរុញទៅបុក រថយន្តមួយគ្រឿងទៀត ដែលកំពុងចតចោល បណ្តាលឲ្យរងការខូចខាតទាំងស្រុង ។
ហេតុការណ៍នេះ បានកើតឡើងកាលពីវេលាម៉ោង ០១ និង៥០នាទីរសៀលថ្ងៃទី ២៤ ខែមេសា ឆ្នាំ២០២៤ នៅតាមបណ្តោយផ្លូវ ព្រះមុន្នីវង្ស សង្កាត់បឹងព្រលឹត ខណ្ឌ៧មករា រាជធានីភ្នំពេញ ។
តាមប្រភពព័ត៌មានពីអ្នកដំណើរបានប្រាប់អោយដឹងថា មុនពេលកើតហេតុគេឃើញមាន រថយន្តព្រូស ពណ៌ស ពាក់ស្លាកលេខ ភ្នំពេញ 2AV-4802 បើកក្នុងទិសដៅស្របគ្នា ជាមួយរម៉កសណ្តោងដឹកសម្ភារៈសម្រាប់តម្លើងកញ្ចក់ ខណៈនោះ រថយន្តបានជ្រុលល្បឿន ទៅបុករម៉កពីក្រោយ ធ្វើអោយរម៉កបន្ត ទៅបុករថយន្តមួយគ្រឿងទៀត កំពុងចតចោលនៅលើចិញ្ចើមផ្លូវ ម៉ាក ហាយឡែនឌ័រ ឆ្នាំ២០១២ ពណ៌ស ពាក់ស្លាកលេខ ភ្នំពេញ 2AE-3392 បណ្តាលអោយ រថយន្តហាយឡែនឌ័រ រងការខូចខាត ទា្វរផ្នែកខាងក្រោយ អស់ចំហៀងទាំងស្រុង ប៉ុន្តែមិនបង្កអោយនរណាម្នាក់ រងរបួសនោះឡើយ ។
ក្រោយពេលកើតហេតុ សមត្ថកិច្ចបានចុះមកដល់រួចបន្តទាក់ទៅមន្រ្តីជំនាញចរាចរណ៍ផ្លូវ គោក នៃស្នងការដ្ឋាននគរបាលរាជធានីភ្នំពេញ ដើម្បីមកធ្វើកំណត់ហេតុ រួចវាស់វែង រួចស្ទូវរថយន្តទាំង០២រួមនិង ម៉ូតូសណ្តោងរម៉ក យកទៅរក្សាទុករងចាំដោះស្រាយពេលក្រោយ ៕ មេសា
