រាជធានីភ្នំពេញ ៖ បុរសម្នាក់ចេញពីកម្មវិធីជប់លៀងខួបកំណើតក្មួយ ត្រឡប់មកផ្ទះវិញ ក៏បុកគ្នាជាមួយរថយន្ត Ford Ranger ពេញមួយទំហឹង បណ្ដាលឲ្យស្លាប់នៅក្នុងថ្លុកឈាម ។
ហេតុការណ៍នេះកើតឡើងនៅតាមបណ្ដោយផ្លូវ៤៣២ កែងនឹងផ្លូវ ១០៥ ស្ថិតនៅក្នុងសង្កាត់បឹងត្របែក ខណ្ឌចំការមន រាជធានីភ្នំពេញ វេលាម៉ោង ៤ទៀបភ្លឺ ត្រូវនឹងថ្ងៃទី ២៩ ខែមេសា ឆ្នាំ ២០២៤។
តាមប្រភពព័ត៌មានពីបងប្អូនប្រជាពលរដ្ឋ និងពីសមត្ថកិច្ចបានដោយដឹងថា មុនពេលកើតហេតុ គេបានឃើញបុរសម្នាក់ បើកម៉ូតូហុងដាឃ្លីបមួយគ្រឿង ធ្វើដំណើរតាមបណ្ដោយផ្លូវ ៤៣២ ក្នុងទិសដៅពីត្បូងតែជើង។ មកដល់ចំណុចកើតហេតុ ផ្លូវបំបែកជា៤ ក៏មានរថយន្ត Ford Ranger មួយគ្រឿង បើកបរដោយបុរសម្នាក់ បុកគ្នាពេញមួយទំហឹង បណ្ដាលឲ្យបុរសខាងលើស្លាប់បាត់បង់ជីវិតភ្លាមៗនៅត្រង់ចំណុចកើតហេតុ. ភ្លាមនោះរថយន្តក៏បានបើកចេញពីកន្លែងកើតហេតុ ព្យាយាមរត់គេច តែត្រូវបានសមត្ថកិច្ចប្រដេញឃាត់យកមកវិញ និងឃាត់អ្នកបើកបររថយន្តយកទៅប៉ុស្តិ៍ដើម្បីធ្វើការសាកសួរនាំ។
ក្រោយកើតហេតុសមត្ថកិច្ចក៏បានទំនាក់ទំនងទៅរកក្រុមគ្រួសារសាច់ញាតិ ឲ្យមកទទួលយកសាកសពយកទៅធ្វើបុណ្យតាមប្រពៃណីនៅឯស្រុកកំណើត។ ចំណែកឯរថយន្តនិងម៉ូតូត្រូវបានសមត្ថកិច្ចប្រគល់ទៅខាងជំនាញចរាចរណ៍ផ្លូវគោកនៃស្នងការនគរបាលរាជធានីភ្នំពេញ ធ្វើការវាស់វែងយកទៅរក្សាទុកដើម្បីរង់ចាំការដោះស្រាយគ្នានៅពេលក្រោយទៀត ៕ Mrr Ka
