រាជធានីភ្នំពេញ ៖ ដួលរលំដើមក្ងោកមួយដើមធំ មកសង្កត់លើកង់បី និងរថយន្តរបស់ប្រជាពលរដ្ឋ បណ្តាលអោយរងការខូចខាត តែមិនបង្កអោយមនុស្សរងរបួសនោះឡើយ ។
ហេតុការណ៍នេះបានកើតឡើងនាវេលាម៉ោង ០២ និង២០នាទី នៅចំណុចខុនដូ ថាម ស្វែរ តាមបណ្តោយផ្លូវ ៣១៧ ស្ថិតក្នុងបឹងកក់ទី០១ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីអ្នករត់កង់បីបានអោយដឹងថា មុនពេលកើតហេតុ គាត់បានបើកបរកង់បី តាមបណ្តោយផ្លូវ ៣១៧ ក្នុងទិសដៅពីកើតទៅលិច គោលបំណងដើម្បីទៅយកភ្ញៀវ ខណៈមកដល់ចំណុចខុនដូ ថាម ស្វែរ ក៏ស្រាប់តែដើមឈើ ប្រភេទដើមក្ងោក បានរលំមកសង្កត់ពីលើតំបូលកង់បីរបស់គាត់ តែសំណាងល្អដោយសារតែមានរថយន្តមួយគ្រឿង ម៉ាក ធុនត្រា ពណ៏ខ្មៅ ដែលចតជាប់និង ដើមឈើដួលរលំនោះ បណ្តាលអោយខ្ទេចមួយកំណាត់មុខ តែមិនបង្កអោយនរណារងរបួសឡើយ ។
ក្រោយមកមានកម្លាំងអាជ្ញាធរមានសមត្ថកិច្ច បានចុះមកដល់ទីតាំងកើតហេតុ រួចបន្តទាក់ទងទៅក្រសួងសាធារណៈការ ដើម្បីកាត់មែកឈើ យកចេញពីផ្លូវ កុំអោយមានការកកស្ទះចរាចរណ៍ ៕ អែលមេសា
