រាជធានីភ្នំពេញ ៖ ដើមគីនីនមួយដើមធំ បានរលំបាក់ទៅលើដងផ្លូវ សំណាងល្អណាស់ ក្នុងហេតុការណ៍នេះ មិនត្រូវចំអ្នកដំណើរ ឬក៏ប្រជាពលរដ្ឋណាម្នាក់ឲ្យរងរបួស ឬខាតបង់ទ្រព្យសម្បត្តិអ្វីនោះទេ ។
ហេតុការណ៍នេះបានកើតឡើង នៅចំណុចកែងមន្ទីរពេទ្យគន្ធបុប្ផា ផ្លូវលេខ៩០ កែង៤៧ ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ នៅចំណុចកើតហេតុនេះ គ្មានខ្យល់បោកបក់នោះទេ ពេលនោះ ស្រាប់តែដើម គីនីន មួយដើមធំ ដែលនៅកែងនឹងមន្ទីរពេទ្យគន្ធបុប្ផានោះ បានពុកផុយឬសកែវ បាក់រលំសង្កត់មកលើផ្លូវតែម្តង សំណាងល្អណាស់ ក្នុងហេតុការណ៍នេះ មិនត្រូវចំអ្នកដំណើរ ឬក៏ប្រជាពលរដ្ឋណាម្នាក់ឲ្យរងរបួស ឬខាតបង់ទ្រព្យសម្បត្តិអ្វីនោះទេ ។
បន្ទាប់ពីកើតហេតុភ្លាមៗ គេឃើញវត្តមាន របស់លោក ជា ខេមា អភិបាលខណ្ឌដូនពេញ បានដឹកនាំកម្លាំងដោយផ្ទាល់ សហការជាមួយមន្ត្រីជំនាញ ធ្វើការកាត់ដើមឈើខាងលើ យកចេញពីផ្លូវ ដើម្បីសម្រួលដល់ការធ្វើដំណើររបស់ប្រជាពលរដ្ឋ ៕ អែល វិចិត្រ
