រាជធានីភ្នំពេញ ៖ ២នាក់ប្តីប្រពន្ធ បានរងរបួស ខណៈជិះម៉ូតូឌុបគ្នាទៅបុកនឹងរថយន្តមួយគ្រឿងទៀត កំពុងឈប់ស្ងៀម ពេញទំហឹង ត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ។
ហេតុការណ៍នេះបានកើតឡើងកាលពីវេលាម៉ោង ៥និង២៣នាទីល្ងាចថ្ងៃទី១២ ខែឧសភា ឆ្នាំ២០២៤ នៅតាមផ្លូវជាតិលេខ៣ ក្បែរស្តុបវត្តស្លែង ភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ។
តាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុគេបានឃើញ ប្តីប្រពន្ធទាំង២នាក់នេះ ប្តីឈ្មោះ សុខ វាសនា ភេទប្រុស អាយុ៣២ឆ្នាំ និងប្រពន្ធឈ្មោះ ឆុន សោភ័ណ្ឌ អាយុ២៦ឆ្នាំ បានជិះម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ឌុបគ្នាក្នុងទិសដៅស្របទិសគ្នាជាមួយរថយន្ត លុះដល់ចំណុចកើតហេតុ មិនដឹងយ៉ាងម៉េច ស្រាប់តែបុកពីក្រោយរថយន្ត មួយគ្រឿងទៀត កំពុងឈប់ស្ងៀមនៅចិញ្ចើមផ្លូវ បណ្តាលឲ្យរបួសទាំង២នាក់ប្តីប្រពន្ធ ត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ។
ក្រោយកើតហេតុ គេឃើញសមត្ថកិច្ចនគរបាលប៉ុស្តិ៍ពងទឹក និងនគរបាលចរាចរណ៍ខណ្ឌដង្កោ បានចុះមកធ្វើការពិនិត្យនិងវាស់វែង និងទុកពេលឲ្យភាគីទាំងសងខាង ចរចារគ្នា ក្នុងនោះដោយសារខាងឡានមានមនោសញ្ចេតនា ក៏បានជួយចេញ២០០ដុល្លារ សម្រួលដល់ការព្យាបាលរបួស ទៅកាន់ប្តីប្រពន្ធខាងលើដើម្បីបញ្ចប់រឿងតែម្តង ៕ អែល វិចិត្រ
