រាជធានីភ្នំពេញ ៖ រថយន្តព្រុសមួយគ្រឿង បើកបុករះរថយន្ត០២គ្រឿងទៀត ដែលចតនៅខាងមុខយានដ្ឋានជួសជុលមួយកន្លែង បណ្តាលអោយរងការខូចខាត យ៉ាងដំណំ ។

ហេតុការណ៏នេះបង្កភ្ញាក់ផ្អើលនៅវេលាម៉ោង ០២ និង ២៥នាទីរសៀលថ្ងៃទី ១៥ ខែឧសភា ឆ្នាំ២០២៤ នៅត្រង់ចំណុចយានដ្ឋាន វីភីអិន អូតូ តាមបណ្តោយផ្លូវ ១០៣ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។

តាមប្រភពព័ត៏មានពីម្ចាស់រថយន្ត បានប្រាប់អោយដឹងថា មុនពេលកើតហេតុ គាត់បានចតរថយន្ត ម៉ាក Ford Ranger ពណ៏ស ពាក់ស្លាកលេខ ភ្នំពេញ 2BQ-2922 នៅមុខយានដ្ឋាន ដោយកង់ក្រោយរថយន្តនៅលើចិញ្ចើមផ្លូវ ។ ខណៈពេលនោះ ក៏ស្រាប់តែមានរថយន្ត ព្រុស ពណ៏ ទឹកប្រាក់ គ្មានស្លាកលេខ ជារថយន្តថ្មីក្រដាសពន្ធ ដោយធ្វើដំណើរតាមបណ្តោយផ្លូវ ១០៣ ទិសដៅពីលិចទៅកើត ដែលអ្នកបើកបរ បើកក្នុងគោលបំណងយករថយន្តទៅអោយអតិថិជនមើល ។ លុះមកដល់ចំណុចកើតហេតុ ស្រាប់តែរេចង្កូតទៅបុករថយន្ត Ford Ranger ចំទ្វារក្រោយចំហៀងខាងស្តាំពេញទំហឹង ក៏រុញច្រានទៅបុករថយន្ត មួយគ្រឿង ម៉ាក Prado ពណ៏ ស ពាក់ស្លាកលេខ រដ្ឋ បណ្តាលអោយបែកស្តុបខាងឆ្វេង និងធ្លាក់កាង ។ ចំណែករថយន្ត Ford Ranger កំពិតទ្វារក្រោយខាងស្តាំ និងបែកស្តុបចំហៀងខាងឆ្វេង ។ រីឯរថយន្ត ព្រុស ខូចខាតមួយកំណាត់មុខយ៉ាងដំណំ និងផ្ទុះពោងសុវត្ថិភាព ។ តែយ៉ាងណានៅក្នុងហេតុការណ៏ខាងលើនោះ មិនបង្កអោយមនុស្សរងរបួសនោះឡើយ ។

ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីមកវាស់វែងស្ទូចយករថយន្តទៅរក្សាទុករងចាំដោះស្រាយពេលក្រោយ ៕មេសា