រាជធានីភ្នំពេញ ៖ អ្នកលេងបណ្តាញសង្គម នៅរសៀលថ្ងៃទី ១៨ ខែឧសភា ឆ្នាំ២០២៤នេះ បានសម្តែងនូវការសោកស្តាយ ក្រោយទទួលបានដំណឹងថា ពូម៉ៅ ដែលតែងតែជួយសម្រួលចរាចរណ៍នៅម្តុំស្តុបមុខវត្តចាក់អង្រែក្រោម ទទួលមរភាពហើយ នៅរសៀលនេះ នៅមន្ទីរពេទ្យរុស្ស៊ី តែនៅមិនទាន់ដឹងនៅឡើយថាគាត់ទទួលមរភាពដោយសារអ្វីអោយប្រាកដ រង់ចាំការបញ្ជាក់ពីសាច់ញាតិ។
សូមរំលឹកផងដែរ ពូម៉ៅ ត្រូវបានគេស្គាល់ថាជាអ្នកជួយសម្រួលចរាចរណ៍នៅចំណុចស្តុបមុខវត្តចាក់អង្រែក្រោម ទាំងក្តៅ ទាំងត្រជាក់ ទាំងភ្លៀង មិនដែលរអ៊ូរទាំ ទោះជីវភាពលោកពូមិនសូវធូរធារ តែលោកពូមានចិត្តជួយសង្គម តាមរយៈការជួយសម្រួលចរាចរណ៍របស់លោកពូ ទាំងលោកពូមានភរិយាពិការនៅឯផ្ទះទៀត ។ កន្លងទៅ លោកពូធ្លាប់បាននិយាយពាក្យមួយឃ្លា ទៅកាន់មហាជនថា លោកពូនឹងជួយសម្រួលចរាចរណ៍ជូនបងប្អូនប្រជាពលរដ្ឋ ដើម្បីកុំឲ្យកកស្ទះចរាចរណ៍ រហូតដល់លោកពូអស់ជីវិត ហើយពេលនេះ លោកពូក៏ទទួលមរណភាពហើយ ។ សូមចូលរួមរំលែកទុក្ខផង ៕
