រាជធានីភ្នំពេញ ៖ ជនសង្ស័យ៥នាក់ ត្រូវបានសមត្ថកិច្ចប៉ុស្តិ៍រដ្ឋបាលសង្កាត់ក្បាលកោះ ធ្វើការឃាត់ខ្លួន ពាក់ព័ន្ធករណី ហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតដោយចេតនាទ្រព្យសម្បត្តិអ្នកដទៃ កាលពីវេលាម៉ោង ១និង១០នាទី ថ្ងៃទី១៩ ខែឧសភា ឆ្នាំ២០២៤ នៅមុខវត្តចំប៉ា ផ្លូវជាតិលេខ១ ភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
តាមរបាយការណ៍ពីសមត្ថកិច្ច ដែលក្រុមការងារ TVFB ទទួលបាន បានឲ្យដឹងថា ជនរងគ្រោះឈ្មោះ ធាន់ ម៉ន ភេទ ប្រុស អាយុ ២៣ឆ្នាំ ជនជាតិ ខ្មែរ មុខរបរ នៅផ្ទះ ស្នាក់នៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល។
ចំណែកជនសង្ស័យទាំង៥នាក់ដែលឃាត់ខ្លួនបាន រួមមាន ៖
១-ឈ្មោះសឿន រតនៈ ភេទប្រុស អាយុ ១៨ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។
២-ឈ្មោះ មុត សុជាតិ ភេទ ប្រុស អាយុ ១៨ឆ្នាំ ជនជាតិខ្មែរ មុខរបរ សិស្ស ស្នាក់ នៅភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ។
៣-ឈ្មោះ គង់ ម៉េងហាក់ ភេទ ប្រុស អាយុ ១៨ឆ្នាំ ជនជាតិ ខ្មែរ មុខរបរ គ្មាន ស្នាក់នៅភូមិព្រែកធំ១ សង្កាត់ក្បាលកោះ
៤-ឈ្មោះ ខាន់ ពន្លឺ ភេទ ប្រុស អាយុ ១៨ឆ្នាំ ជនជាតិខ្មែរ មុខរបរគ្មាន ស្នាក់នៅ ភូមិព្រែកធំ១ សង្កាត់ក្បាលកោះ។
៥-ឈ្មោះ រ័ត្ន ខេមរា ភេទ ប្រុស អាយុ ១៨ឆ្នាំ ជនជាតិខ្មែរ មុខរបរគ្មាន ស្នាក់នៅ ភូមិមិត្តភាព សង្កាត់ព្រែកឯង។
សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះ និងមិត្តភក្តិជិះម៉ូតូទៅផ្ទះ រួចស្រែកឡូឡាតាមផ្លូវ ក៏ជួបក្រុមជនសង្ស័យប្រហែល ៣០នាក់ ឈ្មោះ សឿន រតនៈ, ឈ្មោះ មុត សុជាតិ, ឈ្មោះ គង់ ម៉េងហាក់, ឈ្មោះ ខាន់ ពន្លឺ, ឈ្មោះ រ័ត្ន ខេមរា, ឈ្មោះ មុនី និងបក្ខពួកជាង ២០នាក់ទៀតមិនស្គាល់ឈ្មោះ ជិះម៉ូតូប្រហែល ២០គ្រឿង រួចក្រុមជនសង្ស័យក៏នាំគ្នាយកដុំថ្មគប់ទៅលើជនរងគ្រោះរបូសហើមជង្គង់ស្តាំ, ដៃឆ្វេង និងខ្លួនប្រាណ ហើយគប់ម៉ូតូជនរងគ្រោះម៉ាកហុងដាសេ១២៥ ពណ៌ខ្មៅ ផ្លាកលេខ ភ្នំពេញ ១KN-៦២១០ បែកក្បាំងខាងស្តាំ, បែកកាតាប៊ូក្រោយ និងខូចប្រអប់សោ ពេលនោះក៏មានសមត្ថកិច្ចល្បាតក្បែរនោះជួយអន្តរាគមន៍ ក្រុមជនសង្ស័យក៏នាំគ្នាជិះម៉ូតូគេចខ្លួនអស់ ដោយបន្សល់ទុកនៅកន្លែងកើតហេតុ ម៉ូតូ ៦គ្រឿង, ដុំថ្ម ៧ដុំ, ដាវ១ និងដំបងឈើ១។
លុះដល់ម៉ោង១៥និង០០នាទី ថ្ងៃដដែល សមត្ថកិច្ចឃាត់ខ្លួនបានជនសង្ស័យ ៥នាក់ខាងលើ បញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់ តែម្តង ៕ អែល វិចិត្រ
