ក្រុងឡុងដ៍៖ សារព័ត៌មាន Channel News Asia បានចេញផ្សាយនៅថ្ងៃទី១២ ខែមីនា ឆ្នាំ២០២១ បានឲ្យដឹងថា ចក្រភពអង់គ្លេសបានទទូចដល់ប្រជាពលរដ្ឋរបស់ខ្លួន នៅថ្ងៃសុក្រ (១២ មីនា) ឲ្យ ចាកចេញពីប្រទេសមីយ៉ាន់ម៉ា ឬប្រសិនបើពួកគេមិនអាចចាកចេញពីប្រទេសនេះទេ សូម ស្នាក់នៅក្នុងផ្ទះ ដោយបាននិយាយថា អំពើហិង្សាកំពុងតែកើនឡើង បន្ទាប់ពីកងទ័ពបានទម្លាក់ រដ្ឋាភិបាលរបស់លោកស្រី អ៊ុង សានស៊ូជី នៅក្នុងរដ្ឋប្រហារថ្ងៃទី ១ ខែកុម្ភៈ។

ចំណាត់ការនេះធ្វើឡើងមួយថ្ងៃបន្ទាប់ពីក្រុមសិទ្ធិមនុស្សបាននិយាយថា កម្លាំងសន្តិសុខបានសម្លាប់ក្រុមបាតុករចំនួន ១២នាក់ទៀត ខណៈដែលមេធាវីរបស់លោកស្រី អ៊ុង សានស៊ូជី បានសើចចំអកការចោទប្រកាន់សូកប៉ាន់ថ្មីប្រឆាំងនឹងលោកស្រី។

ក្រសួងការបរទេសបាននិយាយនៅក្នុងសេចក្តីថ្លែងការណ៍មួយថា«ការិយាល័យកិច្ចការបរទេស, អភិវឌ្ឍន៍រដ្ឋ (Commonwealth & Development) (FCDO) ណែនាំឱ្យជនជាតិអង់គ្លេសចាកចេញពីប្រទេសដោយមធ្យោបាយពាណិជ្ជកម្មលើកលែងតែមានតម្រូវការបន្ទាន់ក្នុងការស្នាក់នៅ»។

ភាពតានតឹងផ្នែកនយោបាយនិងភាពចលាចលកំពុងរីករាលដាលចាប់តាំងពីការកាន់កាប់របស់របបយោធាថ្មីនិងកម្រិតនៃអំពើហិង្សាកំពុងកើនឡើង។

អង់គ្លេសបានថ្កោលទោស ចំពោះអំពើហឹង្សានៅក្នុងប្រទេសមីយ៉ាន់ម៉ា និងបានអំពាវនាវឲ្យមានការស្តារលទ្ធិប្រជាធិបតេយ្យឡើងវិញ ដោយលើកឡើងកាលពីដើមសប្តាហ៍នេះថា ខ្លួនកំពុងស្វែងរកការដាក់ទណ្ឌកម្មបន្ថែមលើប្រទេសនេះ។ សូមជម្រាបថាកាលពីថ្ងៃព្រហស្បតិ៍សប្តាហ៍នេះ គេឃើញ មានក្រុមបាតុករយ៉ាងតិច ៩ នាក់ត្រូវបានសម្លាប់ នៅតាមតំបន់ផ្សេងៗគ្នាក្នុងនោះមាន ៦ នាក់ នៅសង្កាត់ Myaing ភាគកណ្តាលប្រទេសមីយ៉ាន់ម៉ា។

អង្គការសិទ្ធិមនុស្ស Amnesty International បានចេញផ្សាយរបាយការណ៍ដ៏ធំមួយ ស្តីពីវិបត្តិកាលពីថ្ងៃព្រហស្បតិ៍ ដោយចោទប្រកាន់របបយោធាថាបានប្រើប្រាស់អាវុធនៅសមរភូមិលើក្រុមបាតុករដែលគ្មានអាវុធនិងធ្វើការសម្លាប់ដែលបានគ្រោងទុកជាមុន៕ ប្រភព៖ Channel News Asia