ខេត្តកំពង់ស្ពឺ៖ អគ្គិភ័យមួយបានឆាបឆេះ ហាងលក់សំលៀកបំពាក់ និងលក់ទូរស័ព្ទដៃទំនើប មួយកន្លែង បង្កការភ្ញាក់ផ្អើល ដល់រថយន្តពន្លត់អគ្គិភ័យជាច្រើនគ្រឿងចុះមកបាញ់ពន្លត់ កាលពីថ្ងៃទី១១ ខែឧសភា ឆ្នាំ២០២១ តាមបណ្ដោយផ្លូវជាតិលេខ ៤ ក្នុងភូមិចំបក់ ឃុំវល្លិ៍ស ស្រុកសំរោងទង ខេត្តកំពង់ស្ពឺ ខូចខាតទ្រព្យសម្បត្តិ និងសម្ភារៈមួយចំនួនធំ ។
ស្នងការដ្ឋាននគរបាលខេត្តកំពង់ស្ពឺ បញ្ជាក់ថា ទីតាំងដែលឆេះនេះ ជាកម្មសិទ្ធិរបស់ឈ្មោះ ពេជ្រ សារឿន ហើយបើតាមការបញ្ជាក់ឲ្យដឹងពីសមត្ថកិច្ចមូលដ្ឋានថា កងកម្លាំងនគរបាលស្រុកសំរោងទង បានចេញជួយអន្ដរាគមន៍ភ្លាមៗ ដោយប្រើប្រាស់រថយន្ដសង្រ្គោះអគ្គិភ័យស្រុកសំរោងទង រថយន្តអគ្គិភ័យ ស្នងការដ្ឋាននគរបាលខេត្តកំពង់ស្ពឺ រួមជាមួយរថយន្តអគ្គិភ័យ របស់កងរាជអាវុធហត្ថខេត្ត ផងដែរ ។
ស្ថានការណ៍នៃការឆាបឆេះ គឺភ្លើងឆេះខ្លាំង និងពិបាកចូលទៅពន្លត់ ដោយបានឆេះអស់ផ្ទះទំហំ ៨ គុណ២១ ម៉ែត្រ ជញ្ជាំថ្ម ដំបូលប្រក់ស័ង្គសី កន្លែងលក់ទូរស័ព្ទដៃ ស្បែកជើង ខោអាវ បណ្ដាលមកពី ឆ្លងចរន្តអគ្គីសនី ៕
