អន្តរជាតិ៖ សារព័ត៌មាន Al jazeera បានចេញផ្សាយនៅព្រឹកថ្ងៃទី១៣ ខែមីនា ឆ្នាំ២០២១ បានឲ្យដឹងថា អង្គការសុខភាពពិភពលោក(WHO)បាននិយាយនៅថ្ងៃសុក្រនេះថា គ្មានហេតុផលណាមួយ ដែលត្រូវបញ្ឈប់ការប្រើប្រាស់វ៉ាក់សាំង AstraZeneca បន្ទាប់ពីបណ្តាប្រទេសអឺរ៉ុបមួយចំនួនបានផ្អាកការប្រើប្រាស់វ៉ាក់សាំងនេះក្នុងការប្រយុទ្ធប្រឆាំងកូវីដ-១៩ ដោយសារតែការព្រួយបារម្ភអំពីបញ្ហាកំណកគ្រាប់ឈាម(blood clot )នោះទេ។

អគ្គនាយកអង្គការសុខភាពពិភពលោកលោក Tedros Adhanom Ghebreyesus បាននិយាយកាលពីថ្ងៃសុក្រ ថា «វ៉ាក់សាំង កូវីដ-១៩ ចំនួនជាង ៣៣៥លានដូស ត្រូវបានប្រើប្រាស់ទូទាំងពិភពលោក ហើយរហូតមកដល់ពេលនេះគ្មានការស្លាប់ណាមួយត្រូវបានគេរកឃើញថាបង្កឡើងដោយវ៉ាក់សាំង កូវីដ-១៩ នោះទេ» ។

យ៉ាងហោចណាស់មានបណ្តាប្រទេសអ៊ឺរ៉ុប ចំនួន ៥ ក្នុងនោះមាន ដាណឺម៉ាក ន័រវែស និងអ៊ីស្លង់ បានផ្អាកការប្រើប្រាស់វ៉ាក់សាំង AstraZeneca បន្ទាប់ពីស្ត្រីជនជាតិដាណឺម៉ាកម្នាក់បានស្លាប់ដោយសារការកកើតកំណកឈាម ។

ទោះយ៉ាងណាទីភ្នាក់ងារវេជ្ជសាស្ត្រអ៊ឺរ៉ុបបានសង្កត់ធ្ងន់ថា គុណប្រយោជន៍នៃការចាក់ថ្នាំនៅតែមានហានិភ័យសម្រាប់ពួកគេ ហើយប្រធានអ្នកវិទ្យាសាស្ត្ររបស់អង្គការសុខភាពពិភពលោក លោកស្រី Soumya Swaminathan បាននិយាយកាលពីថ្ងៃសុក្រថា មិនមានទំនាក់ទំនងបុព្វហេតុណាមួយត្រូវបានបង្កើតឡើងរវាងវ៉ាក់សាំងនិងការកកឈាមនោះទេ។

ដោយសំដៅទៅលើការប្រើប្រាស់ថ្នាំAstraZeneca លោកស្រីបាននិយាយថា« ឥឡូវនេះយើងមានទំនុកចិត្តថាយើងគួរតែបន្តទៅមុខទៀត»។

WHOក៏បាននិយាយផងដែរថា ក្រុមអ្នកជំនាញកំពុងស៊ើបអង្កេតរបាយការណ៍ចុងក្រោយ ហើយនិយាយថារាល់ការផ្លាស់ប្តូរអនុសាសន៍របស់ខ្លួននឹងត្រូវផ្សព្វផ្សាយជាសាធារណៈភ្លាមៗ។ ប្រទេសថៃនិងសាធារណរដ្ឋកុងហ្គោជាប្រទេសមិនមែនអឺរ៉ុបដំបូងគេ ដែលផ្អាកការចែកចាយថ្នាំ កាលពីថ្ងៃសុក្រ។

ប្រទេសកុងហ្គោទទួលបានវ៉ាក់សាំង AstraZenecaចំនួន ១,៧ លានដូសតាមរយៈកម្មវិធីចែកចាយវ៉ាក់សាំងជាសកលនៅថ្ងៃទី ២ ខែមីនា ប៉ុន្តែមិនទាន់ចាប់ផ្តើមយុទ្ធនាការចាក់ថ្នាំបង្ការ នៅឡើយនោះទេ។

ឆ្លើយតបនឹងអ្នកសារព័ត៌មានដែលបានសួរទាក់ទងនឹងបញ្ហានេះ អ្នកនាំពាក្យអង្គការសុខភាពពិភពលោកស្រីវេជ្ជបណ្ឌិត ម៉ាហ្គារែត ហារីស (Margaret Harris) បានលើកឡើងយ៉ាងដូច្នេះថា «ចាស៎ ពិតហើយ! យើងគួរតែបន្តប្រើប្រាស់វ៉ាក់សាំង AstraZeneca នេះតទៅទៀត…គ្មានការចង្អុលបង្ហាញណាមួយដែលត្រូវឈប់ប្រើប្រាស់វានោះទេ»។

គួរបញ្ជាក់ថា ជុំវិញបញ្ហានេះ ក្រុមហ៊ុន Astra Zeneca និង អាជ្ញាធរឱសថអឺរ៉ុប បានចេញមុខធានាអះអាងពីគុណភាព និងសុវត្ថិភាពរបស់វ៉ាក់សាំង Astra Zeneca។ ទីភ្នាក់ងារឱសថអឺរ៉ុប បានឲ្យដឹងថា គិតរហូតដល់ថ្ងៃទី០៩ ខែមីនា ឆ្នាំ២០២១នេះ គេរកឃើញថានៅក្នុងចំណោមអ្នកដែលបានទទួលវ៉ាក់សាំង Astra Zeneca ជាង៣លាននាក់ នៅក្នុងទឹកដីងអឺរ៉ុប មានតែមនុស្ស២២នាក់ប៉ុណ្ណោះដែលមានបញ្ហាដំកំណកឈាមក្នុងសរសៃឈាម៕ ប្រភព៖ Al jazeera