ខេត្តបាត់ដំបង ៖ មានករណីអគ្គិភ័យឆាបឆេះ មួយកើតឡើង នៅចំការតាង៉ែន និងចំការឫស្សីដែលជារបស់ក្រុមហ៊ុនចិន នៅថ្ងៃទី០៤ ខែមេសា ឆ្នាំ២០២៥ វេលាម៉ោង១៣:២០នាទី ស្ថិតនៅចំណុចភ្នំប្រាក់ ភូមិបុះខ្នុរ ឃុំចែងមានជ័យ ស្រុកបាណន់ ខេត្តបាត់ដំបង និងចំការស្វាយ ០២កន្លែងទៀតស្ថិតនៅចំណុចកើតហេតុខាងលើ ម្ចាស់ចំការទី១មានឈ្មោះ ទឹម សារ៉ាក់ ភេទ ប្រុសអាយុ៦៨ឆ្នាំ រស់នៅភូមិបុះខ្នុរ ឃុំចែងមានជ័យ ស្រុកបាណន់ និងម្ចាស់ចំការទី២ឈ្មោះ ឡុង សយសុធី ភេទប្រុស រស់នៅក្រុងបាត់ដំបង ។ នេះបើយោងតាមផេកផ្លូវការរបស់ អគ្គស្នងការដ្ឋាននគរបាលជាតិ ។
ចំការដែលរងការខូចខាតមាន៖ ចំការរបស់ក្រុមហ៊ុនចិនឆេះលើផ្ទៃដីចំនួន ១៤ហិចតា និងបានខូចខាតដើមតាង៉ែនចំនួន៨០០ដើម, ដើមឫស្សីអស់ចំនួន២០០០គុម្ព និងខូចខាតប្រពន្ធ័ទុយ៉ូតូចៗ សំរាប់ស្រោចស្រពទាំងស្រុង ។ ម្ចាស់ចំការស្វាយទី១ដែលមានឈ្មោះ ទឹម សារ៉ាត់ ឆេះផ្ទៃដីចំនួន១៦ហិចតា ឆេះអស់ទាំងស្រុង ខូចខាតដើមស្វាយអស់ចំនួន ៤៤៨០ដើម និងម្ចាស់ចំការស្វាយទី២ដែលមានឈ្មោះ ឡុង សយសុធី ការខូចខាតមិនទាន់ដឹង ដោយសារម្ចាស់មិននៅ ។
សមត្ថកិច្ចជំនាញ បានឲ្យដឹងថា៖ ក្នុងករណីអគ្គិភ័យនេះ កំពុងធ្វើការស្រាវជ្រាវ ។ គ្រោះអគ្គិភ័យនេះ មិនបានបង្កគ្រោះថ្នាក់ដល់អាយុជីវិតមនុស្សឡើយ ។
ករណីនេះដែរកម្លាំងនគរបាលការិយាល័យនគរបាលបង្ការពន្លត់អគ្គីភ័យ និងសង្រ្គោះ នៃស្នងការដ្ឋានខេត្តបាត់ដំបង សហការជាមួយអធិការនគរបាលស្រុកបាណន់ បានចុះពន្លត់អគ្គិភ័យ នេះដោយប្រើប្រាស់រថយន្តពន្លត់អគ្គិភ័យចំនួន ០៥គ្រឿង ប្រើប្រាស់ទឹកអស់ចំនួន ០៤រថយន្ត ទើបគ្រប់គ្រងស្ថានការណ៍ អគ្គិភ័យនេះបានទាំងស្រុង៕
