បរទេស៖ តាមការចេញផ្សាយរបស់សារព័ត៌មានVN Express នៅថ្ងៃទី០៤ ខែមេសា ឆ្នាំ២០២៥នេះ បានឲ្យដឹងថា ក្រុមអ្នកជួយសង្គ្រោះ បានរកឃើញសាកសពអតីតជ័យលាភីបវកញ្ញាទេសចរណ៍ឆ្នាំ២០១៨ ម្នាក់ នៅក្រោមគំនរបាក់បែកនៃអគារខុនដូ Sky Villa នៅទីក្រុង Mandalay ប្រទេសមីយ៉ាន់ម៉ា បន្ទាប់ពីរងគ្រោះរញ្ជួយដីដ៏ធ្ងន់ធ្ងរកាលពី១សប្ដាហ៍មុន សាកសពរបស់នាង ពាក់អាវពណ៌ស និងខោជើងវែង កាន់កាបូបលុយក្នុងដៃ ។
សូមបញ្ជាក់ថាគ្រោះរញ្ជួយដីដែលមានកម្រិត ៧.៧ រ៉ិចទ័រ យោងតាមការស្ទាបស្ទង់ភូមិសាស្ត្រសហរដ្ឋអាមេរិក បានវាយប្រហារកណ្តាលប្រទេសមីយ៉ាន់ម៉ា កាលពីថ្ងៃទី ២៨ ខែមីនា ខណៈការរញ្ជួយបានកើតឡើងនៅទូទាំងប្រទេសជិតខាង រួមទាំងប្រទេសថៃ វៀតណាម និងផ្នែកខ្លះនៃប្រទេសចិនផងដែរ ខណៈគិតត្រឹមព្រឹកថ្ងៃសុក្រ តួលេខមនុស្សស្លាប់ដោយរញ្ជួយដីនៅមីយ៉ាន់ម៉ា បានកើនឡើងដល់ ៣,៩០១នាក់ និង៥,៩៧៨នាក់រងរបួស ខណៈ៧១៩នាក់បាត់ខ្លួន តែទោះបីជាយ៉ាងណា ក្រុមជួយសង្គ្រោះព្រមានថា តួលេខជនរងគ្រោះអាចនឹងបន្តហក់ឡើងខ្ពស់ទៀត ព្រោះនៅមានតំបន់ជាច្រើនដែលក្រុមរុករកមិនទាន់ទៅដល់ ។
យោងតាមកាសែត The New York Times អគារ Sky Villa ដែលជាអគារខុនដូកម្ពស់ ១២ជាន់ត្រូវបានសាងសង់ក្នុងឆ្នាំ ២០១៧គឺជាទីតាំងមួយក្នុងចំណោមទីតាំងដែលរងការបំផ្លិចបំផ្លាញធ្ងន់ធ្ងរបំផុតពីគ្រោះរញ្ជួយដី។
ដោយឡែក តាមរយៈដំណើរការកំណត់អត្តសញ្ញាណសាកសព នាងគឺជា Sili Mee ដែលបានឈ្នះការប្រកួតបវរកញ្ញាទេសចរណ៍មីយ៉ាន់ម៉ាឆ្នាំ ២០១៨ ដែលជាបវកញ្ញាតំណាងប្រទេសមីយ៉ាន់ម៉ាក្នុងកម្មវិធីប្រកួត Miss Tourism World 2018 និង Miss Tourism World Intercontinental 2019 នៅប្រទេសចិន ខណៈអ្នករៀបចំកម្មវិធី Miss Tourism Myanmar ក៏បានបញ្ជាក់ព័ត៌មាននៃការស្លាប់នេះ និងចូលរួមរំលែកទុក្ខដល់គ្រួសារបវកញ្ញារូបនេះផងដែរ ពេលនេះសពរបស់នាងនឹងត្រូវយកទៅទីក្រុង Yangon ហើយធ្វើបុណ្យតាមពិធីសាសនា ៕
